Прашан кој сегмент од Реформската агенда претставува предизвик за исполнување во предвидениот рок, Муртезани рече дека засега нема точни индикации каде би се доцнело, но дека динамиката за одредени закони може да се забрза
Сите реформски чекори од Реформската агенда на Владата 2024-2027, која се однесува на Планот за раст на Европската комисија, со краен рок декември, се испратени до Комисијата и таа има рок од 90 работни дена да утврди дали реформите се успешно имплементирани, рече министерот за европски прашања Орхан Муртезани по отворањето на тркалезната маса за предизвиците и придобивките од Планот за раст за Западен Балкан.
Тој додава дека сите реформски чекори со рок јуни 2025 година се следат и координираат на дневна основа и додаде дека за овие реформски чекори вчера имало тематска седница на Владата.
„Засега нема точни индикации каде би се доцнело, меѓутоа динамиката за одредени закони може дополнително да се забрза за да влезе во предвидените рокови“,
рече Муртезани.
Прашан дали станува збор за законите поврзани со реформи во судството, Муртезани, рече дека не станува збор за доцнење, туку дека е потребно повеќе време за самите процеси.
„Во духот на вчерашните разговори во Собранието, реформите таму бараат поголем општествен консензус, а тоа значи поголемо време за да се усогласат. Тоа не значи дека се доцни заради недоволна координација, туку тие процеси по природа апсорбираат повеќе време“,
изјави Муртезани.
Целиот овој процес, рече Муртезани, не само за нас и за Европската комисија е нов и допрва се учи.
„За сите реформски чекори коишто нема да се завршат навреме, има период од 12 месеци грејс период токму заради оваа причина“,
додаде Муртезани.
Прашан кој сегмент од Реформската агенда претставува предизвик за исполнување во предвидениот рок, Муртезани, рече дека засега нема точни индикации каде би се доцнело, но дека динамиката за одредени закони може да се забрза.
Тркалезната маса што денеска се одржа во Владата, посочи Муртезани, се организира во насока на претставување на Реформската агенда пред невладиниот сектор.
„На овој начин градиме партнерства со невладиниот сектор во процесот на имплементација на Планот за раст и Реформската агенда и со јавноста бидејќи сметаме дека придобивките коишто директно државата и нашите граѓани ги имаат од Реформската агенда и Планот за раст не се доволно објаснети, и не се доволно јасни за граѓаните, затоа ваквиот начин на градење на партнертства со невладиниот сектор и со сите други заинтересирани страни и во иднина ќе продолжи“,
изјави Муртезани.
Тој, исто така, посочи дека останува целосно отворен и посветен за секаква соработка која што ќе значи поголема информираност и поголема корист за граѓаните.
Муртезани во обраќањето на тркалезната маса рече дека реформите што се спроведуваат за периодот 2024–2027 година се дел од една поголема слика. Тие, додаде Муртезани, не се наменети само за исполнување на барањата на Европската комисија туку за секој граѓанин кој сака пристапна едукација, ефикасна администрација, чист воздух, фер правда и вреден труд.
„Реформската агенда е повеќе од програмски документ. Таа е концептуална рамка за редефинирање на институционалната логика на државата, начин да се премостат системските празнини меѓу законот и правдата, меѓу политиката и јавниот интерес, меѓу економските политики и човечкиот развој“,
додаде министерот.
На отворањето на тркалезната маса денеска се обрати и премиерот Христијан Мицкоски кој порача дека ако сакаме во Европската Унија, ако сакаме раст, мора да го урнеме коруптивниот систем. Тој рече дека држава во која граѓанинот се чувствува понижен, беспомошен, принуден „да плати за да добие“ е држава која не може да напредува.