Папата Франциск беше првиот поглавар на Римокатоличката црква кој доаѓа од Латинска Америка, и првиот понтиф (првосвештеник) роден надвор од Европа по повеќе од илјада години
Претседатели на држави, премиери и државници преку објави на социјалните мрежи упатија последен поздрав и изразија сочувство и почит кон папата Франциск кој утрово почина на 88-годишна возраст.
Папата Франциск беше 266. поглавар на Римокатоличката црква, а тажната вест за милиони верници утрово ја соопшти кардиналот Кевин Ферел, ватиканскиот камерленго.
Тој беше првиот папа кој доаѓа од Латинска Америка, и првиот понтиф (првосвештеник) роден надвор од Европа по повеќе од илјада години.
За време на водење на Римокатоличката црква тој своето внимание го фокусираше на сиромаштијата и нееднаквоста, критикувајќи ги околностите кои доведуваат до овие појави, а беше жесток поборник за заштита на животната средина.
Италијанската премиерка Џорџа Мелони изјави дека веста за смртта на папата Франциск, кого го нарече голем човек и голем пастир, е причина за голема тага, пренесе Ројтерс.
„Имав привилегија да уживам во неговото пријателство, неговите совети, неговите учења, кои никогаш не престанаа дури ни за време на искушенија и страдања. Со срце полно тага се простуваме со Светиот Отец“,
рече таа.
Изразувајќи почит и зборови на сочувство кон починатиот папа, францускиот претседател, Емануел Макрон рече дека за време на неговиот понтификат, папата Франциск секогаш стоел на страната на најранливите и најкревките и дека тоа го правел со многу понизност.
„Во ова време на војна и бруталност, тој имаше смисла за другиот, за најкревкото“,
рече Макрон во изјава за новинарите.
Тој му се заблагодари на папата за неговите посети на Франција, вклучувајќи го и неговото патување на Корзика во декември.
Макрон изрази сочувство до католиците ширум светот, велејќи дека „голема болка“ се чувстува во Франција и во светот.
„Почивај во мир, папа Франциск“, стои во објавата на профилот на Белата куќа на платформата Икс, придружена со фотографии на претседателот Доналд Трамп и потпретседателот Џеј-Ди Венс со папата Франциск.
Rest in Peace, Pope Francis. ✝️ pic.twitter.com/8CGwKaNnTh
— The White House (@WhiteHouse) April 21, 2025
Германскиот канцелар Олаф Шолц изјави дека со смртта на папата Франциск Католичката црква и светот губат срдечна личност, која секогаш се залагала за најраливите и немоќните.
„Многу го ценев неговото јасно гледиште за предизвиците со кои се соочуваме“,
напиша на Икс, германскиот премиер во заминување, Олаф Шолц изразувајќи сочувство до католичките верници ширум светот.
With the death of Pope Francis, the Catholic Church and the world lose an advocate for the weak, a reconciling and a warm-hearted person. I greatly appreciated his clear view of the challenges we face. My sympathies go out to the religious community worldwide. pic.twitter.com/GIvpTS6puk
— Bundeskanzler Olaf Scholz (@Bundeskanzler) April 21, 2025
Фридрих Мерц, кој се очекува да положи заклетва како германски канцелар следниот месец, исто така, изрази голема тага за смртта на папата.
„Франциск ќе биде запаметен по неговиот неуморен ангажман за најслабите во општеството, за правда и помирување. Го водеа смирението и вербата во Божјата милост“,
објави Мерц на платформата Икс.
Претседателот на Германија Франк-Валтер Штајнмаер рече дека светот „изгубил светилник на надежта“.
„Неговата скромност, неговата спонтаност и неговиот хумор, но пред сè неговата опипливо длабока вера ги допре луѓето ширум светот, им даде поддршка, сила и ориентација“,
рече Штајнмаер во изјавата испратена преку соопштение.
Полскиот претседател Анджеј Дуда рече дека папата бил голем апостол на милосрдието, во кој го гледал одговорот на предизвиците на современиот свет.
Почит за денеска починатиот папа и сочувство до милионите католички верници ширум светот изразија и првите луѓе на институциите на Европската Унија.
„Им се придружувам на повеќето милиони луѓе ширум светот кои тагуваат за смртта на неговата светост, папата Франциск. Беше длабоко сочувствителен. Тој се грижеше за големите глобални предизвици на нашето време – миграцијата, климатските промени, нееднаквостите, мирот, како и за секојдневните борби на еден и на сите“,
наведе претседателот на Европскиот совет Антонио Кошта.
Тој посочи дека со својата најнова порака за Светскиот ден на мирот, папата предложи три активности за да може да дојде до „трајна промена“ – простување на меѓународниот долг, укинување на смртната казна и прераспределба на средствата за воените потреби за ставање крај на гладот.
„Нека неговите идеи продолжат да не водат кон иднината на надеж. Requiescat in pace (Нека почива во мир)“,
додаде Кошта.
Претседателката на Европската комисија, Урсула фон дер Лајен рече дека денеска светот жали за смртта на папата Франциск, кој како што наведе таа инспирирал милиони луѓе, и надвор од Католичката црква со својата понизност и толку чиста љубов за помалку среќните.
„Моите мисли се со сите кои ја чувствуваат оваа длабока загуба. Нека најдат утеха во идејата дека наследството на папата Франциск ќе продолжи да не води сите нас кон поправеден, мирен и сочувствителен свет“,
наведе Фон дер Лајен.
Today, the world mourns the passing of Pope Francis.
— Ursula von der Leyen (@vonderleyen) April 21, 2025
He inspired millions, far beyond the Catholic Church, with his humility and love so pure for the less fortunate.
My thoughts are with all who feel this profound loss.
May they find solace in the idea that Pope Francis’… pic.twitter.com/FiI6SASNl8
Претседателката на Европскиот парламент, Роберта Мецола наведе дека Европа жали за смртта на неговата светост, папата Франциск.
„Неговата заразна насмевка ги освои срцата на милиони луѓе ширум светот. ‘Народниот папа’ ќе остане запаметен по неговата љубов кон животот, надежта за мир, сочувството за еднаквоста и социјалната правда. Нека почива во мир“,
додаде Мецола.