Според информациите од дипломатските кругови, американскиот план практично би ја замрзнал војната, а териториите под руска окупација би останале под контрола на Москва. Амбициите на Украина за членство во НАТО би биле симнати од масата
САД на сојузниците им го претставиле нацрт-предлог за мировен договор меѓу Русија и Украина, пишува „Индекс.хр“ повикувајќи се на американскиот медиум Блумберг.
Договорот, како што рекле европски претставници за Блумберг, а кои биле запознаени со предлогот, вклучувал рамковни услови за прекин на борбите и постепено олеснување на санкциите кон Москва во случај на траен прекин на огнот.
Според информациите од дипломатските кругови, американскиот план практично би ја замрзнал војната, а териториите под руска окупација би останале под контрола на Москва. Амбициите на Украина за членство во НАТО би биле симнати од масата.
Сепак, официјалните лица одбиле да дадат дополнителни детали, наведувајќи ја доверливата природа на разговорите.
Предлогот, како што пишува Блумберг, бил претставен на вчерашните средби во Париз меѓу кои беше и онаа на францускиот претседател Емануел Макрон и американскиот пратеник Стив Виткоф, како и одвоените консултации меѓу американскиот државен секретар Марко Рубио и советниците и преговарачите за национална безбедност од Франција, Германија, Велика Британија и Украина.
Според тоа што Блумберг претходно го објави, американските власти сакаат да постигнат целосен прекин на огнот во рок од неколку недели, а разговорите треба да продолжат следната недела во Лондон.
„Еден официјален претставник рече дека предложениот план не е конечен мировен договор и дека европските сојузници нема да ги признаат окупираните територии како руски. Нагласено е и дека разговорите се бесмислени доколку Кремљ не се согласи да ги прекине нападите и дека е клучно на Украина да и се понудат безбедносни гаранции за договорот да има тежина“,
пишува американскиот медиум.
Извор запознаен со преговорите, се додава во написот, наведува дека Украина веќе се согласила на прекин на огнот, а ставот на Киев е дека Русија мора прво да се согласи на прекин на огнот, пред да се разговара за други теми.
Европските претставници ги оценуваат средбите во Париз како конструктивни и позитивни, нагласувајќи дека тие се обид Европа, во договор со Киев, да покаже поддршка за американските напори и да ја притисне Москва да ја докаже сериозноста на своите намери.
По вчерашните разговори во Париз со европски и украински претставници за тригодишниот конфликт во Украина, Рубио истакна дека САД ќе престанат да се обидуваат да постигнат мировен договор доколку не се појават јасни знаци дека тој може да се постигне.
„Нема да продолжиме по овој пат со недели и месеци. Треба да знаеме многу брзо, за неколку дена, дали е можен договор во следните неколку недели. Ако е можно – се вклучуваме. Ако не е – имаме други приоритети“,
рече Рубио.
Кремљ денеска официјално го објави крајот на 30-дневното примирје за енергетската инфраструктура, а руските напади врз украинските градови продолжуваат.
Стив Виткоф, специјалниот пратеник на американскиот претседател Доналд Трамп, во интервју за „Волстрит журнал“ изјави дека неговиот неодамнешен разговор за Украина со рускиот претседател Владимир Путин во Санкт Петербург бил фокусиран на територијалните прашања.
Според него, Русија би можела да задржи некои нови региони, но не сите, како дел од договорот за ставање крај на војата во Украина. Виткоф рече дека Киев можеби не е толку заинтересиран за регионите каде што населението првенствено зборува руски јазик.
Украинскиот претседател Володимир Зеленски го критикуваше американскиот пратеник Виткоф за „прифаќањето на рускиот наратив“.
„Нема мандат да се разговара за украинските територии бидејќи овие територии припаѓаат на нашиот народ. Не разговараме за териториите додека не дојде до примирје. Украинската земја никогаш нема да биде признаена како руска“,
рече Зеленски.