Директорката на ДИЖС рече дека ќе ги превземе сите соодветни мерки во согласност со законот и ќе ја информира јавноста за следните чекори
Нема цијанид во водата на Крива река во Крива Паланка, утврди Државниот инспекторат за животна середина (ДИЖС), соопшти денеска на прес-конференција директорката на Инспекторатот Ивана Гиновска.
Според неа, поединци излегувале со неточни и полуточни информации и успеале да направат збунетост кај населението.
„Ќе зборувам со факти со цел да ги запрам сите шпекулации што се ширеа во јавноста: На 14 март од страна на компанијата ‘Булмак 2016’, преку електронска пошта добив известување за инцидент дека е пукната цевка од технолошка вода од таложникот за јамски води до погонот флотација. Согласно своите законски надлежности, веднаш издадов налог за вонреден инспекциски надзор и државните инспектори веднаш излегоа на терен“,
рече Гиновска.
На компанијата „Булмак 2016“, како што информира таа, изречена ѝ е казна од 180-200 илјади евра за правниот субјект и 10 илјади евра за одговорното лице, која е најголема казна во Законот за животна средина. Компанијата потпишала спогодба и предметот е предаден на Комисијата за спогодување, при Министерството за животна средина и просторно планирање.
„Компанијата ‘Булмак’ 24.03.2025 г. од страна на ДИЖС е задолжена со решение да преземе мерки за процена на евентуална штета врз животната средина. Таа ќе биде извршена од страна на надворешни стручни лица веднаш по добивање на официјалниот извештај кој ќе покаже дали имало било какво влијание врз почвата, водата и живиот свет и дали има последици врз животната средина“,
најави Гиновска.
Директорката на ДИЖС рече дека ќе ги преземе сите соодветни мерки во согласност со законот и ќе ја информира јавноста за следните чекори.
„Ги демантирам шпекулациите дека тој ден инспектори од ДИЖС не излегле на терен. Ги отфрлам сите обвинувања каде што се наведуваше дека имам изјавено, дека се излеало само вода. Таква изјава не постои никаде. Ги демантирам шпекулациите дека има помор на риби во Крива Река, од 14.03.2025 до ден денес не е забележан никаков помор. И, исто така, сакам јавноста да биде запознаена со тоа дека дека екоцид не се докажува со 1 литар вода земена од едно место и со само еден примерок, туку со темелна и сеопфатна анализа“,
децидна беше Гиновска.
Таа потврди и дека цијанид неколку стотици пати над дозволеното ниво во Крива Река, како што тврди градоначалникот на Крива Паланка, нема и додаде дека овој еколошки инцидент ги покажал слабостите на системот кој го наследила, истовремено ветувајќи дека овој случај ќе има правна разрешница, а јавноста ќе биде запознаена со сите мерки кои се преземени од страна на инспекторатот.
Претходно градоначалникот на Крива Паланка, Сашко Митовски, тврдеше дека водата во Крива Река е сериозно загадена и спаѓа во најлошата категорија на загадени води, неупотреблива за која било намена. Тој обвини дека по хаваријата во „Тораница“, Крива Река има стотици пати повеќе цијанид и десетпати повеќе олово, по што побара кривична одговорност.
По прес-конференцијата на Гиновска, реагираа од владејачката ВМРО-ДПМНЕ од каде што побараа Митовски кривично да одговара за ширење паника во јавноста. Партијата тврди дека градоначалникот на Крива Паланка свесно ширел паника за да собере политички поени.
„Повторно се докажа дека СДС шири лажни вести и ја манипулира јавноста. Државниот инспекторат за животна средина утврди дека цијанид во водите на Крива река, нема. Градоначалникот на Крива Паланка од редовите на СДС, Сашко Митовски, велеше дека за 100 пати над дозволеното имало цијанид во водите на Крива река. За овие изнесени лаги и ширење на паника меѓу сограѓаните, кривично се одговара. Митовски за политички поени во пресрет на локалните избори, свесно ширел паника и невистини во Крива Паланка. Сепак, за среќа на жителите на Крива Паланка, но и на граѓаните на Македонија, цијанид во Крива река нема над дозволеното. Митовски треба кривично да одговара за свесно ширење на паника со цел собирање на политички поени“,
соопштија од ВМРО-ДПМНЕ.