Како што рече Таравари, Карадаковски бил еден од четворицата многу критични пациенти кои се згрижени надвор од државата. За жал, рече министерот за здравство, Карадаковски им подлегна на повредите, а другите тројца и натаму се во многу критична состојба
Министерот за здравство Арбен Таравари денеска на прес-конференција потврди дека починатиот пациент кој беше на лекување во Литванија по трагичниот пожар во т.н. кабаре „Пулс“, е 29-годишниот Александар Карадаковски од Кочани.
Според информациите што ги добиле од лекарите од Литванија, како што информира Небојша Настов, директор на болницата „Св. Наум Охридски“, Карадаковски починал како резултат на директното оштетување на голем дел од дишното стебло, речиси 90 проценти, поради вдишениот чад, што резултирало со смрт. Дополнително, како што посочија Настов и Таравари, Карадаковски имал 36 отсто изгореници по телото, главно кај главата, вратот и горните екстремитети, што предизвикало рани и инфекции, а му откажале и бубрезите на 1 април, односно бил ставен на дијализа.
По пожарот во Кочани, Карадаковски бил донесен во болницата за хируршки болести „Св. Наум Охридски“ во Скопје во 6 часот утрото.
„Пациентот е примен околу 6 часот утрината по трагедијата. Во текот на денот состојбата му се влоши во попладневните часови поради што беше извршена интубација, односно веднаш беше поставен на апарати за вештачко дишење. Беше спроведен интензивен третман и обработка на изгореници со вкупна површина од 36 проценти. Изгорениците беа од втор и трет степен. Поради чадот што го вдишал, оштетени му биле дишните органи. Колегите во Литванија, со кои редовно се брифиравме, ни потврдија дека било утврдено оти е оштетен голем дел од дишното стебло кај Карадаковски поради што дошло до влошување на состојбата и подлегнување на повредите“,
изјави Настов.
Тој додаде дека за Карадаковски, во рок од 24 часа од приемот во „Св. Наум Охридски“, бил организиран транспорт и бил префрлен во Литванија.
Како што рече Таравари, Карадаковски бил еден од четворицата многу критични пациенти кои се згрижени надвор од државата. За жал, рече министерот за здравство, Карадаковски им подлегна на повредите, а другитре тројца и натаму се во многу критична состојба.
Телото на Карадаковски ќе биде транспортирано во Македонија и трошоците за тоа ќе бидат покриени, а обдукцијата на телото ќе биде извршена во Судска медицина во Скопје, додаде министерот за здравство.
Таравари информира дека во моментов во државата се лекуваат 14 пациенти повредени во пожарот во Кочани. Петмина од нив ќе бидат испуштени на домашно лекување, а преостанатите девет ќе останат во болница, но нивната состојба е стабилна.
Денес се враќаат шест нови пациенти кои се лекуваат во странство, по двајца од Бугарија, Шпанија и Унгарија.
Надвор да се лекуваат остануваат 69 пациенти. Од нив, како што информира Таравари, интубирани се не повеќе од 20, од кои тројца се во многу критична и нестабилна состојба.