Официјална потврда се очекува на прес-конференција на Министерството за здравство закажана за денеска во 13:30 часот
Почина Александар К., управителот на т.н. кабаре „Пулс“ во Кочани, каде што на 16 март 2025 година изби пожар и животот го загубија 59 лица, а повредени се околу 200. Тој е 60. жртва од трагедијата во Кочани.
Управителот на „Пулс“ почина додека беше на лекување во Литванија. Тој беше еден од осомничените во истрагата.
Официјална потврда во јавноста се очекува да биде објавена на прес-конференција на Министерството за здравство закажана за денеска во 13:30 часот.
Во врска со трагедијата во Кочани, во која загинаа 59 лица, осомничени се 27 физички, три правни лица и седум полициски службеници од Штип и Кочани.
На сите осомничени им е одредена мерка 30-дневен притвор, освен на хоспитализираните.
Обвинителскиот тим што ја води истрагата за пожарот во Кочани е составен од 11 јавни обвинители.
Изнесувајќи ги првичните детали околу отворената истрага државниот обвинител Љупчо Коцевски на 21 март рече дека тројца од вкупно 27-те осомничени физички лица се јавуваат како одговорни лица, косопственици или управители во извесен период во правното лице, чија подружница е т.н. кабаре-клубот „Пулс“.
Според регистарот на Министерството за економија и податоците во Централниот регистар, носител на лиценците за кабаре – легални и фалсификуваната, е фирмата ММММ Кафе ДООЕЛ од Кочани, чиј сопственик и управител е Александар Карадакоски.
Инаку, за вистински сопственик на т.н. кабаре се смета Д.Ј., во чиј дом, возило и два угостителски објекти во рамки на истрагата се вршени претреси.