Премиерот рече дека Владата прави сѐ што е во нејзина моќ за да се спаси живот повеќе од повредените и дека ќе направи сѐ што треба за економски и социјален препород на Кочани
Нека трагедијата во Кочани биде поука за сите нас дека она што го правиме денес ќе има свое значење во иднина – порача вечерва премиерот Христијан Мицкоски од вклучувањето на хуманитарното отворено студио на телевизијата Канал 5 за донирање средства за настраданите во Кочани.
Премиерот додаде дека Владата прави сѐ што е во нејзина моќ за да се спаси живот повеќе од повредените.
„Се радувам дека дел од повредените полека се испишуваат од болниците во Скопје, но се враќаат и од странство. Сѐ што е потребно за економски и социјален препород на Кочани, ние како Влада ќе го ставиме во нашите врвни приоритети и тоа ќе го направиме. Посакувам да се обединуваме за убави работи, а оваа трагедија нека биде за сите нас поука дека она што денеска го правиме ќе има свое значење во иднина. Би сакал тоа што ние денеска го правиме како Влада има позитивно и убаво значење за иднината на нашите граѓани и нашата Македонија“,
изјави Мицкоски.
Изразувајќи сочувство до семејствата на загинатите во трагедијата, премиерот рече дека жали што треба да се случат вакви трагедии за да сфатиме дека силата е во единството и дека, како што рече, тоа очајно ни треба како нација и држава без оглед на етничките или верските разлики.
„Мислам дека Македонија е обединета. За жал, беше обединета во тага и во болка. Би сакал еден ден сите да се обединиме за нешто убаво, за нешто што ќе значи живот, радост, иднина. Континуирано треба да сме обединети“,
додаде тој.
Телевизија Канал 5 вечерва организира донаторска вечер со телефонски јавувања, на која, покрај премиерот Христијан Мицкоски, учество земаа и претседателката Гордана Сиљановска-Давкова, претседателот на Собранието Африм Гаши, лидерот на опозициската СДСМ, Венко Филипче, министри, претставници на политички партии, луѓе од јавниот и општествениот живот.