„Цело време работел без лиценца, а прашањето е тие што му потпишале во 2021 и во 2023 година како му потпишале и врз основа на кои елаборати и на кои документи. Во 2024 година видовме како му потпишале. Бидејќи на тоа архивско бројче на кое се води оваа фалсификувана лиценца е кореспонденција со странски инвеститор“, рече премиерот коментирајќи ја работата на клубот во Кочани каде што вчера се случи пожар во кој загинаа 59 лица
Во 2024 година се издадени вкупно 12 лиценци за кабареа. Можете да претпоставите колку клубови работат во државата, а само 12 поседуваат лиценца. Ова денеска го изјави премиерот Христијан Мицкоски одговарајќи на прашањето дали има информација колку ноќни клубови во земјава имаат валидни лиценци, прашање што се отвори откако вчера обелодени дека лиценцата што ја поседувала дискотеката во Кочани била фалсификувана.
„Од тие, не знаеме кои се сè уште валидни, бидејќи на некои претпоставувам рокот им е изминат, оти се со важност од една година“,
рече тој.
Посочи дека ги очекува многу работа, оти е очигледно дека некој не си ја вршел работата и сега се обидува под наводно некаква политизација да ја сокрие криминалната работа која ја правел изминатите години додека раководел со таа институција.
„Нема да има милост. Тоа и вчера го кажав. Ќе го повторам и денеска. Кој сака нека биде. Од каква етничка припадност и од која сака политичка партија. Тоа што се случувало е повеќе од криминал. Ова е масовно убиство што некој го дозволувал за пари, за мито, за корупција да се случи“,
кажа премиерот.
За клубот „Пулс“ во Кочани каде вчера се случи трагедијата рече дека лиценца е извадена само двапати, во 2021 и во 2023 година, давајќи одговор на новинарско прашање каде ќе се лоцира одговорноста со оглед на тоа дека клубот работел веќе 15 години.
„Цело време работел без лиценца, а прашањето е тие што му потпишале во 2021 и во 2023 година како му потпишале и врз основа на кои елаборати и на кои документи. Во 2024 година видовме како му потпишале. Бидејќи на тоа архивско бројче на кои што се води оваа фалсификувана лиценца е коресподенција со странски инвеститор“,
вели Мицкоски.
Додаде дека сите клубови што работат на диво ќе бидат затворени.
Објектот каде се наоѓал клубот бил легализиран во 1999 и во 2014 година со елаборат кој што е согласно Закон за легализација на дивоградби.
Премиерот Христијан Мицкоски вчера на прес-конференција обелодени дека лиценцата за работа на дискотеката е фалсификувана и издадена на 13 март 2024 година, со важност од една година, а на неа стои потписот на тогашната државна секретарка во Министерството за економија, Размена Чекиќ-Дуровиќ. Министер во тоа време е Крешник Бектеши, кадар на ДУИ.