„Државниот управен инспекторат нема ингеренции за одземање на надлежности на министри ниту за водење истраги за корупција – тие се во доменот на правосудните органи, кои токму ДУИ ги блокираше со години за да се заштити од одговорност“, велат од Министерството за јавна администрација
Целосно неточни, злобно конструирани и со политичка заднина се обвинувањата на Демократската унија за интеграција (ДУИ) дека Државниот управен инспекторат утврдил злоупотреба на службената положба и му ги одзел надлежности на министерот за животна средина и просторно планирање Изет Меџити, велат во реакцијата испратена попладнево од Министерството за јавна администрација.
Инспекторатот, како што се наведува во соопштението од Министерството, најостро ги демантира и отфрла како лаги и манипулации ваквите обвинувања од Демократската унија за интеграција.
„ДУИ како партија која повеќе од две децении ја држеше заробена администрацијата и систематски ја претвораше во алатка за партиски интереси, сега се обидува да манипулира со јавноста преку лаги и дезинформации. Државниот управен инспекторат нема ингеренции за одземање на надлежности на министри, ниту за водење истраги за корупција – тие се во доменот на правосудните органи, кои токму ДУИ ги блокираше со години за да се заштити од одговорност“,
додаваат од Министерството за јавна администрација.
Оттаму велат дека она што навистина се случило е редовен инспекциски надзор во Управата за животна средина, спроведен согласно Годишниот план за работа за 2024 година. Овој надзор, како што се додава во соопштението, се однесува исклучиво на почитувањето на законските процедури и нема никаква поврзаност со обвинувањата што ги пласира ДУИ.
„Очигледно е дека ДУИ, соочена со губење на влијанието и привилегиите што си ги создаде врз грбот на граѓаните, сега посегнува по очајни методи на политички спинови. Наместо да одговорат за сопствените злоупотреби и партизација на институциите, се обидуваат да ја префрлат вината врз оние што вистински работат на градење транспарентна и професионална администрација“,
се вели во соопштението.
Од Министерството за јавна администрација, нагласуваат дека преку Државниот управен инспекторат, нема да дозволат политички структури да го злоупотребуваат системот за свои дневнополитички цели.
„Јавноста има право да знае дека оваа Влада се води од принципите на законитост и отчетност – нешто што ДУИ никогаш не можеше да го постигне додека беше на власт“,
велат од Министерството за јавна администрација.
Реакцијата од Министерството за јавна администрација доаѓа откако утрово од ДУИ преку соопштение рекоа дека вицепремиерот Изет Меџити останува без надлежности во Министерството за животна средина.
Од ДУИ рекоа дека, по контрола спроведена од Инспекторатот за администрација, е потврдена злоупотреба на службената должност од страна на Меџити и неговиот кабинет, а врз основа на решението на Инспекторатот за администрација со број 11-1653/2024 од 17.1.2025 година, Изет Меџити е целосно лишен од своите надлежности, кои се пренесени на Дирекцијата за животна средина.
Со оваа одлука, како што рекоа од ДУИ, новиот директор е задолжен да не испраќа на потпис во кабинетот на Меџити ниту еден документ од клучните сектори на министерството, вклучувајќи го Секторот за природа, води, отпад, животна средина и индустриско загадување.
„Оваа мерка е донесена како резултат на бројни поплаки и пријави од граѓани и компании кои биле условувани од кабинетот на Меџити да даваат мито во замена за административни услуги“,
се вели во соопштението од ДУИ.