На вистинското место се – рече претседателката во однос на дипломатската позиција на Владата во поглед на САД, додавајќи дека лоби-групите во Соединетите Американски Држави имаат најголемо влијание врз креирањето на политиката
Претходно денеска, прашан за зачестените посети на премиерот на Вашингтон, евроамбасадорот во земјава Михалис Рокас рече дека ако се во можност, напорите на САД да придонесат во забрзувањето на евроинтеграциите на земјава се повеќе од добредојдени
Претседателката Гордана Сиљановска-Давкова ја поздрави засилената дипломатска активност на премиерот и на Владата во поглед на Соединетите Американски Држави (САД), оценувајќи ја за политички одговор на, како што вели, огромните и бурни трансформации во кои влезе светот.
Претседателката ова го кажа одговарајќи на новинарски прашања по денешната посета на МАНУ, додека е во тек третата посета на премиерот Христијан Мицкоски на САД откако застана на чело на Владата.
На вистинското место се – рече претседателката во однос на дипломатската позиција на Владата во поглед на САД, додавајќи дека лоби-групите во Соединетите Држави имаат најголемо влијание врз креирањето на политиката.
„Се разбира, зошто во САД, јасно е – не затоа што амбасадорката на САД со право вели дека тоа е вистински чекор, туку затоа што сите што знаеме политика, знаеме дека САД се засновани на системот на лобирање. Значи, лоби-групите во САД имаат најголемо влијание врз креирањето на политиката. Ретко сме имале прилика и ние да познаваме клучни актери и фактори во креирањето на американската политика. Веројатно, тогаш тоа место е добро место за креирање стратегија“,
рече Сиљановска-Давкова одговарајќи на новинарски прашања.
Претходно денеска, прашан за зачестените посети на премиерот на Вашингтон, евроамбасадорот во земјава Михалис Рокас рече дека ако се во можност, напорите на САД да дадат свој придонес во забрзувањето на евроинтеграцискиот процес на земјава се и повеќе од добредојдени.
Тој ова го кажа по посетата на Струмица, одговарајќи на новинарско прашање како тој ги гледа зачестените посети на Мицкоски на САД и дали тоа може да се толкува како оддалечување на земјава од европскиот пат, особено ако се имаат предвид ставовите на американскиот претседател Доналд Трамп во однос на политиките на ЕУ.
„Трансатлантските односи се најважни билетарелани релации насекаде низ светот. ЕУ ги смета САД за еден од главните партнери коишто ги имаме во светот, така што самата посета на вашиот премиер на САД сметам дека покажува оти САД ако се во можност да дадат свој придонес во забрзувањето на евроинтегративниот процес или европскиот пат на вашата земја, тогаш таквите напори се повеќе од добредојдени“,
изјави Рокас.
Американската амбасадорка во земјава Анџела Агелер, во изјава за медиумите од пред два дена, изрази воодушевување што премиерот е во нова посета на САД.