Според него, замрзнувањето на цените не може да биде од 1 февруари како што предвидува власта, затоа што податоците на Заводот за статистика укажуваат дека веќе во јануари има пораст на цените
Мерката е задоцнета – вака пратеникот и поранешен вицепремиер за економски прашања Фатмир Битиќи ја оценува денешната одлука на Владата за ограничување на бруто-профитните маржи во трговијата на мало и големо за 102 групи производи, односно за над 1 000 прехранбени и непрехранбени производи.
Според Битиќи, во предлозите што опозицијата ги има е замрзнување на цени и одредување на бруто маржа на производите.
„За реално намалување на цените и поддршка на стандардот на граѓаните владата треба да ги прифати предлозите на СДСМ. Ние пошироко гледаме затоа што знаеме со што се соочувавме кога инфлацијата беше на доста високо ниво“,
рече Битиќи во вечерашното гостување во вестите на Сител телевизија.
Тој вели дека Владата денеска требало да донесе порадикална одлука со која ќе бидат опфатени повеќе групи на производи.
„Владата денеска требаше да оди уште порадикално, а тоа е наместо 102 групи на производи да ги опфати сите категории на производи, тие се 238 групи на производи коишто се со повластена даночна стапка од пет отсто“,
рече Битиќи.
Битиќи рече и дека со предлогот за измени на Законот за ДДВ, што вчера беа поднесени во Собранието од страна на СДСМ и коалицијата, ќе има значително намалување на цените и оти со севкупниот пакет мерки и примена на Законот за нефер трговски практики, цените може да се намалат и до 30 отсто.
„Законот за намалување на ДДВ за електричната енергија директно ќе направи притисок за намалување на цената од 13 отсто, а може и повеќе, додека укинувањето на ДДВ не би се однесувало на 100 групи на производи, туку на сите 238 групи и ќе доведе до реално поевтинување од 18 проценти веднаш. Ако Законот за нефер трговски практики се примени само еден месец, заедно со мерките што денеска ги донесе владата и заедно со мерките што ги предложи СДСМ цените севкупно ќе се намалат за 30 отсто“,
рече Битиќи.
Според него, замрзнувањето на цените не може да биде од 1 февруари како што предвидува власта, затоа што податоците на Заводот за статистика укажуваат дека веќе во јануари има пораст на цените.
„Се земаат зголемени цени, па се замрзнуваат. Требаше да се вратат наназад неколку месеци, најмалку 3 месеци, затоа што секое претпријатие дали на големо или мало операрира со одредени количини прoизводи кои ги има набавено пред 2-3 месеци со други цени. Сега вие им дозволувате да продадат производи со зголемени цени“,
рече Битиќи.
Владата на денешната седница донесе одлука за која заменик-министерот за економија и труд Марјан Ристески рече дека е за да се заштити животниот стандард на граѓаните, односно да се намалат трошоците за живот во потрошувачката кошничка.
Ристески рече дека на пет отсто се ограничува маржата на осумте основни прехранбени производи и тоа: леб, брашно тип 400 и тип 500, јајца, масло за јадење, млеко, јогурт и кисело млеко.
Маржа од десет отсто се ограничува за група од 55 прехранбени производи како месо и преработки од месо, шеќер, млечни производи, маргарин, путер, конзервиран зеленчук и овошје, грав, ориз и тестенини. Ограничување на 15 отсто бруто-профитна маржа, пак, ќе се применува за 39 групи прехранбени производи и средства за хигиена и тоа: свежо овошје и зеленчук, детергенти, бебешка храна, пелени, сапун, тоалетна хартија и слично.
Одлуки ќе стапат во сила следниот ден откако ќе бидат објавени во службен весник и ќе траат до 30 април.