Откако во 5:30 часот осомничениот заспал, грабнатиот ја искористил приликата, го зел клучот и избегал, по што веднаш го пријавил настанот
Осомничен е 56-годишен маж што вчера во скопската населба Ѓорче Петров извршил грабнување на едно лице на кое му се заканил по животот, со цел да го присили да му го врати долгот во парични средства од 8 илјади денари и мобилен телефон вреден 12 илјади денари, информираат од Обвинителството.
За осомничениот е отворена истражна постапка за сторено кривично дело – грабнување.
„Околу 1:30 часот по полноќ додека оштетениот спиел дома, осомничениот со остар железен предмет – сатар почнал да ја крши влезната врата, насилно ја отворил и влегол внатре. Со закани дека ќе ги убие, го удрил оштетениот со сатарот по главата, градниот кош и грбот, по што го присилил да се облече и го одвлекол до својот дом. Таму го заклучил и го држел присилно да не избега, постојано заканувајќи му се дека ќе го убие ако не му го врати долгот“,
пишува во соопштението од Обвинителството.
Оттаму додаваат дека откако во 5:30 часот осомничениот заспал, грабнатиот ја искористил приликата, го зел клучот и избегал, по што веднаш го пријавил настанот.
За осомничениот е доставен и предлог за определување мерка притвор, поради опасност од бегство или можност да влијае врз сведоците или да го повтори делото.