„Тука многу поголеми ингеренции имаат училиштето, општината, социјалните служби. Но, ние детето нема да го напуштиме и сè уште сме во процес на барање на најсоодветно решение за момчето“, вели министерката
Министерството за образование и наука (МОН) постапува според закони и свои можности, но нашите ингеренции во случајот со момчето од ОУ „Лазо Ангеловски“ се најмали, вели министерката Весна Јаневска.
Таа вели дека МОН сè уште е во процес на барање најсоодветно решение за овој ученик и ги негира изјавите од родители на деца што учат во ова училиште дека Министерството испратило писмо во кое се вели дека третооделенецот ќе биде испишан и запишан во друга општина.
„Информацијата не е точна дека има такво писмо од МОН. Прашање е дали детето е проблематично или системот е проблематичен, и системот не е спремен да се справи со проблемите што се појавуваат во него. МОН постапува според закони и свои можности, иако ингеренциите на МОН во овој случај се најмали. Тука многу поголеми ингеренции имаат училиштето, општината, социјалните служби. Но, ние детето нема да го напуштиме и сè уште сме во процес на барање на најсоодветно решение за момчето“,
рече Јаневска денеска во одговор на новинарско прашање.
Случајот со третоодделенецот се актуализира кога тој од ОУ „Лазо Ангеловски“ во Ново Лисиче требаше да биде префрлен во ОУ „11 Октомври“ во Центар.
Тогаш родителите на учениците од „11 Октомври“ ја бојкотираа наставата, а по повлекување на одлуката и негово враќање во „Лазо Ангеловски“, празни останаа училниците и во ова училиште.
Учениците од ОУ „Лазо Ангеловски“ го прекинаа бојкотот откако бил донесен заклучок детето до крајот на првото полугодие да продолжи со онлајн настава со цел во меѓувреме да се изврши соодветна процена за заштита на детето и другите деца во одделението.