Бројот на севернокорејски војници убиени и повредени во Украина најверојатно надмина 3 000, вклучувајќи околу 300 мртви и 2 700 ранети, изјави денеска јужнокорејски пратеник повикувајќи се на информации од тамошната разузнавачка агенција
Украинскиот претседател Володимир Зеленски изјави дека Киев е подготвен да ги предаде севернокорејските војници на нивниот лидер Ким Џонг-ун доколку тој може да обезбеди нивна размена за украинските војници заробени во Русија.
„Покрај првите заробени севернокорејски војници, сигурно ќе има уште. Прашање на време е кога нашите војници ќе успеат да заробат други“,
напиша Зеленски на социјалната мрежа Икс.
Зеленски вчера изјави дека Украина заробила двајца севернокорејски војници во рускиот регион Курск.
Според украинските и западните проценки, околу 11 000 севернокорејски војници се во регионот Курск за да им помогнат на руските сили. Русија ниту го потврди ниту го демантира нивното присуство. Зеленски вели дека руските и севернокорејските сили претрпеле големи загуби.
„Украина е подготвена да му предаде војници на Ким Џонг-ун доколку тој може да организира нивна размена со нашите војници заробени во Русија“,
рече Зеленски.
Тој објави кратко видео на кое се гледа сослушувањето на двајца мажи кои се претставуваат како севернокорејски војници.
In addition to the first captured soldiers from North Korea, there will undoubtedly be more. It’s only a matter of time before our troops manage to capture others. There should be no doubt left in the world that the Russian army is dependent on military assistance from North… pic.twitter.com/4RyCfUoHoC
— Volodymyr Zelenskyy / Володимир Зеленський (@ZelenskyyUa) January 12, 2025
Зеленски рече дека може да има други опции за севернокорејските војници кои не сакаат да се вратат дома и дека таа можност ќе им се даде на оние што изразуваат желба да го доближат мирот со ширење на вистината за оваа војна на корејски јазик. Тој не ги појасни деталите.
Бројот на севернокорејски војници убиени и повредени во Украина најверојатно надмина 3 000, вклучувајќи околу 300 мртви и 2 700 ранети, изјави денеска јужнокорејски пратеник повикувајќи се на информации од тамошната разузнавачка агенција.
„Се чини дека севернокорејските власти ги повикале своите војници да извршат самоубиство така што ќе се разнесат со бомба за да избегнат апсење“,
рече пратеникот цитирајќи ја јужнокорејската Национална разузнавачка служба (НИС).
Заробените севернокорејски војници не покажале намера да дојдат во Јужна Кореја, иако Јужна Кореја би соработувала со Украина доколку има барање, објави новинската агенција Јонхап повикувајќи се на НИС.