Од денес ќе останеме тука пред Уставниот суд ден и ноќ, на мирен начин да ги заштитиме нашите права и да осигураме дека нема ниту една одлука да го уништи она што го изградивме со жртвување – порача Арбер Адеми, потпретседател и портпарол на ДУИ
Актвисти на опозициската ДУИ попладнево пред Уставниот суд се собраа под иницијатива, како што ја нарекоа, „Стража на јазикот“, во пресрет на седницата на Уставен суд в среда на 11 декември, на која ќе се расправа за Законот за јазиците.
Арбер Адеми пред присутните најави дека ќе останат пред објектот на Уставниот суд до 11 декември.
„Собрани сме тука за да го кренеме нашиот глас за прашања кои ги засегаат темелите на еднаквоста на нашата мултиетничка држава. Ова не е обичен ден, ниту обичен повик. Денес повеќе од кога било е моментот да останеме обединети за да го заштитиме тоа што сме го добиле со многу труд и жртвување. На 11 декември Уставниот суд има закажано седница за разгледување на уставноста на законот за јазици, кој не е само правен акт, туку е симбол на Охридскиот договор и во него е втемелена јазичната еднаквост“,
рече Адеми.
Тој рече дека Законот за јазиците не е само обичен закон, туку и прашање за правата како рамноправни граѓани, идентитет и иднина како општество.
„Охридскиот мировен договор е нашата гаранција за праведно и еднакво општество. Од денес ќе останеме тука пред Уставниот суд ден и ноќ, на мирен начин да ги заштитиме нашите права и да осигураме дека нема ниту една одлука да го уништи она што го изградивме со жртвување. Ова не е иницијатива на една политичка партија“,
изјави Адеми, кој ги повика граѓаните од сите етнички заедници да се приклучат во иницијативата „Стража на јазикот“.
Претходно, премиерот Христијан Мицкоски рече дека „в среда нема ништо да се случи“, затоа што пред „какво било акција“ на Уставниот суд претходат подготвителни седници.
Според него, целта на ДУИ е поделба по етничка основа и такви обиди ќе има и во иднина.
„Затоа што принципот ‘како до сега’ заврши на 8 мај и тој принцип е поразен. Но, сѐ уште покажува знаци на живот и гледаме дека единствената тема со која Демократската унија за интеграција е присутна во јавност е да направат одредена поделба по етничка основа, ги третираат само етничките прашања, затоа што на друг начин не можат да привлечат внимание, ниту да наметнат тема, ниту да привлечат луѓе коишто ќе ги поддржуваат“,
рече Мицкоски, меѓу другото.
Вчера, над 250 потписници, меѓу кои и универзитетски професори од албанската академска заедница, се потпишаа на писмо до уставните судии во пресрет на седницата. Потписниците им се обраќаат на уставните судии со сомнеж дека тие ќе бидат соучесници во политички мотивиран процес.