Соборувањето на владата го остава претседателот Емануел Макрон да се соочи со најтешката политичка криза во неговите два претседателски мандати
Франција се најде во политичка криза откако вечерва Долниот дом на парламентот на земјата ѝ изгласа недоверба на малцинската влада на премиерот Мишел Барние, кој функцијата ја извршуваше само три месеци, пишуваат светските медиуми.
Барањето за гласање недоверба пред францускиот парламент го поднесе сојузот на крајнолевичарските партии, а беше поддржан од пратениците од екстремно десничарскиот Национален фронт на Марин Ле Пен.
За соборување на владата на Барние вечерва гласаа вкупно 331 пратеник, што е значително повеќе од неопходното мнозинство од 288 гласа.
Сега, како што пишува „Гардијан“ во освртот по гласањето, Барние ќе мора да поднесе оставка како премиер, откако пред гласањето предупреди дека Франција ќе биде „втурната во непознатото“.
Соборувањето на владата го остава претседателот Емануел Макрон да се соочи со најтешката политичка криза во неговите два претседателски мандати. Денешниот исход го става под прашање одлучувањето за буџетот на земјата за следната година што беше и повод прашањето за доверба на владата на Барние да се најде пред пратениците во францускиот парламент.
Макрон, чиј втор претседателски мандат трае до напролет 2027 година, не е обврзан самиот да се повлече. Тој ја отфрли можноста да поднесе оставка, нарекувајќи го таквото сценарио „политичка фикција“. Но, дел од ултралевичарите и крајната десница повикаа на негово повлекување.
Инаку, ова е првпат од 1962 година француската влада да падне поради гласање недоверба.Тогаш беше соборена владата на Жорж Помпиду, додека претседател на земјата беше Шарл де Гол. Со денешното гласање недоверба, кабинетот на Барние стана влада со најкраток век од која било администрација на Петтата француска република, која започна во 1958 година.
Во услови кога не можат да се распишат нови парламентарни избори пред јули 2025 година, а националното собрание е длабоко поделено, опциите на Макрон се доста стеснети.
Имено, откако Макрон распиша ненадејни и неубедливи предвремени избори во јуни, францускиот парламент беше поделен меѓу три групи без апсолутно мнозинство. Левиот сојуз освои најголем број гласови, но не успеа да постигне апсолутно мнозинство. Центристичката групација на Макрон претрпе загуби, но остана на нозе, додека екстремно десничарскиот Национален фронт на Ле Пен доби повеќе пратенички места, но беше задржан од власта со тактичко гласање на левицата и партиите од центарот.
Барние, кој беше поранешен преговарач на Европската Унија Брегзит, беше назначен од Макрон во септември по двомесечна политичка парализа по изборите.
Клучната задача на Барние, која го донесе и неговиот пад, беше туркањето на буџетот за 2025 година, кој, како што кажа тој, ќе се справи со дефицитот на земјата преку зголемување на даноците и намалување на трошоците од 60 милијарди евра. Но, по неколку недели ќор-сокак, Барние во понеделникот го протурка нацрт-законот за финансирање на социјалното осигурување, користејќи го членот 49.3 од уставот на земјата, кој ѝ дозволува на владата да донесе законски решенија без гласање во парламентот. На ова ултралевичарскиот табор и десничарските популисти одговорија со гласање недоверба.
Малцинската коалиција на Барние, како што пишува „Гардијан“, во суштина претходно беше подржувана од Ле Пен, која иако беше надвор од владата, имаше моќно влијание. Барние се обидуваше да ја смири за да избегне нејзината партија да се приклучи на гласањето недоверба, па дури и преговараше со неа директно приспособувајќи го буџетот според нејзините барања.
Сепак, Ле Пен во меѓувреме се повлече, велејќи дека буџетот на Барние е опасност за земјата.
Таа рече дека „ги штити и брани“ 11-те милиони гласачи на својата партија, за кои кажа дека се длабоко загрижени за трошоците за живот.
Жан-Филип Танги, пратеник од нејзината партија, пак, изјави:
„Да се нема буџет е подобро од реалниот буџет, кој кажува многу за тоа колку е лош“
Доколку парламентот не го усвои буџетот до 20 декември, владата може да предложи вонредна легислатива со која ќе се префрлат ограничувањата за трошоците и даночните одредби од 2024 година, во очекување на доаѓањето на нова влада и нов предлог-закон за буџетот за 2025 година.
Шефот на парламентарната комисија за финансии, Ерик Кокерел, член на левичарската партија на Жан-Лук Меланшон, рече дека гласањето недоверба е знак на „надеж“ и дека чувствува дека „огромното мнозинство Французи го поддржуваат“. Меланшон, кој во моментов не е пратеник, денеска беше во парламентот за да биде сведок на, како што рече, „историски ден“.
Лидерот на Социјалистичката партија, Оливије Форе, кој смета дека сега треба да има премиер од левицата, рече дека Макрон мора да разговара со францускиот народ.
„Како може да го остави францускиот народ во оваа неизвесност непосредно пред Божиќ?“,
изјавил Форе за весникот „Ле монд“.