Ние спроведуваме наша истрага. Имаме одредени сомнежи, но истрагата ќе покаже кој наредил, а мислиме дека имаме сознанија и кој е извршител. Ќе продолжиме да работиме, а додека тоа не заврши, нема да објавуваме и да ја префрламе вината на некој друг, рече Вучиќ
Обвинувањата дека Белград стои во заднина на нападите се невистинити, луѓето да бидат мирни и спокојни, ние сме фер и како сериозна држава не се занимаваме со обвинувања и не велиме дека директен нарачател на нападот е Албин Курти, кажа српскиот претседател Александар Вучиќ во обраќање за јавноста. Според Вучиќ, станува збор за голем и жесток обид за хибриден напад на земјата.
„Истрагата ќе покаже, ние спроведуваме наша истрага. Имаме одредени сомнежи, но истрагата ќе покаже кој наредил, а мислиме дека имаме сознанија и кој е извршител. Ќе продолжиме да работиме, а додека тоа не заврши, нема да објавуваме и да ја префрламе вината на некој друг“,
рече Вучиќ.
Фото: Принтскрин
Вучиќ додаде и дека се подготвени за соработка со ЕУЛЕКС и КФОР за истрагата поврзана со експлозијата која се случи на 29 ноември вечерта во Зубин Поток, што предизвика сериозни оштетувања на каналот Ибар-Лепенц и предизвика голем прекин во водоснабдувањето.
Косовскиот премиер Албин Курти веднаш ја обвини Србија дека е одговорна за нападот. А по полициската рација која се случуваше во текот на вчерашниот ден, косовските власти соопштија дека уапсиле осуммина.
„По интензивна истрага, денеска извршивме контроли на 10 локации, при што беа уапсени осум лица осомничени дека учествувале во криминални и терористички акции. Контролата е извршена во соработка со правосудните органи и Косовската разузнавачка агенција (КОА). Запленето е оружје, експлозиви, униформи и други предмети кои ќе служат за истрагата. Владата на Косово и нејзините институции нема да запрат додека сите овие криминалци и терористи не бидат уапсени и изведени пред лицето на правдата“,
рече министерот за внатрешни работи на Косово, Џељаљ Свечља.