Четириесетгодишен велешанец е загинатиот во сообраќајката кај Рибарци – СВР Велес со детали за несреќата

Во несреќата, во која учествувале патничко и товарно возило, се повредени три лица од кои две потешко. По наредба на јавен обвинител, телото на загинатиот е дадено на обдукција

Четириесетгодишен велешанец со иницијали М.П. е лицето што го загубило животот во сообраќајната несреќа што денеска наутро се случи на регионалниот пат Кавадарци-Неготино, во близина на селото Рибарци во Општина Росоман, информираат од Секторот за внатрешни работи Велес.

Сообраќајката, според пријавата во кавадаречката полиција, се случила околу 8:45 часот, а во неа учествувале автомобил марка „сеат“ и товарно возило „опел“, во кое сопатник бил загинатиот велешанец, кој од здобиените повредени починал на самото место.

„Смртта ја констатирал лекар од Здравствен дом Кавадарци“, велат од СВР Велес.

Во несреќата со тешки повреди се здобиле возачот на товарното возило Б.Ј. (46) и 18-годишната А.Н. која била сопатник во автомобилот, што го управувала нејзина врсничка со иницијали В.З. кај која била констатирани телесни повреди.

Едно лице загинало, а три се повредени во сообраќајна несреќа на патот Кавадарци-Росоман

Тие, според полициските информации, биле пренесени во кавадаречката болница, каде што им биле констатирани повредите.

Јавен обвинител заедно со екипа од Одделението за внатрешни работи (ОВР) Кавадарци извршиле увид на местото, а по наредба на обвинителот телото на загинатиот велешанец е дадено на обдукција.