Портпаролот на ИДФ, адмирал Даниел Хагари, изјави дека Синвар цела ноќ се криел со семејството во тунелите под Кан Јунис во центарот на Газа и додаде дека Синвар со години го планирал нападот врз Израел на 7 октомври минатата година
Одбранбените сили на Израел (ИДФ) објавија видео за кое тврдат дека го прикажува лидерот на Хамас, Јахја Синвар, во подземни тунели само неколку часа пред масакрот на 7 октомври минатата година.
Израелците тврдат дека на снимката се гледаат Синвар и членовите на неговото семејство како носат телевизори и други работи низ тунелите каде што би останале скриени и од каде што може да набљудуваат што се случува надвор. ИДФ тврдат дека тоа е доказ оти Синвар го планирал нападот.
Портпаролот на ИДФ, адмирал Даниел Хагари, изјави дека Синвар цела ноќ се криел со семејството во тунелите под Кан Јунис во центарот на Газа и додаде дека Синвар со години го планирал нападот врз Израел на 7 октомври минатата година.
Тој, исто така, рече дека на снимката на која наводно се гледаат Синвар и неговото семејство како се движат во еден од подземните тунели на Хамас само неколку часа пред смртоносниот напад минатата година, може да се забележи и како семејството носи телевизор и друга опрема со себе.
„Ова е луксуз што жителите на Газа го немаа бидејќи Синвар секогаш се ставаше себеси, своите пари и терористите на Хамас пред народот на Газа“,
рече Хагари.
🎥DECLASSIFIED FOOTAGE:
— LTC Nadav Shoshani (@LTC_Shoshani) October 19, 2024
Sinwar hours before the October 7 massacre: taking down his TV into his tunnel, hiding underneath his civilians, and preparing to watch his terrorists murder, kindap and rape. pic.twitter.com/wTAF9xAPLU
ИДФ објавија слично видео во февруари, за кое тврдеа дека го прикажува Синвар како шета низ тунел со своето семејство по нападот на 7 октомври.
Хамас ги обвини ИДФ за ширење безобразни лаги и ги отфрли коментарите на Хагари како „очајнички обид да се спаси образот за поразената војска“. Оттаму додадоа дека Синвар бил убиен во акција откако ја поминал изминатата година на различни фронтови во Газа предводејќи го отпорот на нивниот храбар народ.