Од Министерството за туризам посочуваат дека оваа платформа овозможува промоција на субјекти кои не работат согласно законот. Од „Букинг“ реагирале дека се подготвени да ги едуцираат давателите на сместување за нивните обврски
Oнлајн платформата за резервации на апартмани и хотели низ светот „Букинг“ (Booking), во Србија се соочува со обвинувања од властите за огласување на нерегистрирани даватели на приватно сместување, односно станови кои нивните сопственици ги издаваат, а не плаќаат данок за тоа. Од Министерството за туризам посочуваат дека оваа платформа овозможува промоција на субјекти кои не работат согласно законот. Од „Букинг“ реагирале дека се подготвени да ги едуцираат давателите на сместување за нивните обврски.
„Во туризмот, кој постојано се развива и носи сè поголем девизен прилив, има многу сива економија, а најголем проблем се корисниците на приватното сместување и странски платформи кои во Србија работат на црно“,
изјави минатата недела министерот за туризам Хусеин Мемиќ.
Мемиќ особено го вперил прстот кон компанијата „Букинг“ за која рекол дека државниот апарат размислувал да го укине нејзиното работење.
Од Министерството за порталот „Нова економија“ потврдиле дека биле остварени средби со регионални претставници на „Букинг“ и дека по тој повод било дадено предлог решение во форма на барање за единствен матичен број (JID) на регистрирани угостители од Е-турист, при склучување на договор за огласување помеѓу угостителите и „Букинг“.
Како што посочиле од министерството, претставниците на „Букинг“ не се согласиле со предлогот, туку како единствена можност го презентирале предлогот за спроведување информативна кампања за нивните корисници.
Од „Букинг“ за „Нова економија“ изјавиле дека се подготвени да соработуваат со надлежните органи во Србија со цел да ги едуцираат своите провајдери на сместување за нивните законски обврски.
„Кога се регистрирате за огласување на сместување на нашата платформа, давателите на услуги мора да ги прифатат нашите услови за користење, потврдувајќи дека имаат законско право да го изнајмат своето сместување“,
нагласиле од компанијата.
Оттаму додале и дека воспоставиле сигурен процес преку кој надлежните органи можат да пријават евентуални неправилности во однос на огласените објекти и дека брзо ќе реагираат и ќе ги отстранат објектите доколку се утврди дека не работат во согласност со локалните закони.