„Во моментов сè е на позиционирање и поставување на играта и нема поместување или напредок“, вели премиерот
Кога ќе има нови детали или барем некој напредок во односот со Бугарија, ќе ја информирам опозицијата, вели премиерот Христијан Мицкоски како одговор на барањето на лидерот на Социјалдемократскиот сојуз на Македонија (СДСМ), Венко Филипче, за свикување затворена собраниска седница на која Владата ќе го презентира планот и следните чекори за евроинтегративниот процес.
Мицкоски вчера во емисијата „Отворено студио 100 дена Влада“ на МРТ рече дека во моментов нема поместување или напредок во односите и сè е на позиционирање и поставување на играта.
„Кога ќе има нешто за кое би требало да биде информирана опозицијата, тогаш верувајте веднаш ќе ги информираме. Односно да има барем некој напредок за да може да го споделиме со опозицијата. Во моментов сè е на позиционирање и поставување на играта и нема поместување или напредок“,
рече Мицкоски.
На прашањето зошто додека ВМРО-ДПМНЕ беше во опозиција и беше силен критичар на тоа дека СДСМ задоцнето или воопшто не ја вклучува опозицијата во овие клучни процеси поврзани со стратегиските интереси, сега тие како власт ја повторуваат истата грешка, Мицкоски рече дека нема да го прават истото и да ги повторуваат грешките.
Тој рече дека проблемот кај тогашната власт во односот со опозицијата бил суштински различен.
„Тоа што го зборувам јавно би им го кажал и ним. Можеби некој детаљ околу тоа со кои луѓе сум го разговарал сето тоа, но тоа не гледам дека е важно за јавноста“,
рече Мицкоски.
Мицкоски додаде и дека кога ќе има потреба ќе го повика и претседателот на СДСМ, но и другите лидери на партиите за да ги запознаа со напредокот.
„Пред да се прифати т.н. француски предлог ние имавме два месеци претходно прес-конференција во која повикавме на вклучување на опозицијата, затоа што имавме информации дека се случува тоа и тоа. Повикавме немојте, ќе направите грешка, тие рекоа дека не ги интересира, сами ќе си го тераме процесот. И видовме до каде го дотераа. Првиот момент кога ќе има било какво поместување ќе ги информираме, лично ќе го повикам и него, ќе повикам и лидерска средба со сите други и ќе ги запознам со напредокот или со можното решение“,
рече Мицкоски.
Во одговорот на прашањето тој нагласи и дека додека е премиер никогаш нема да влезе во процес клучен за државата и иднината на граѓаните во кој опозицијата и другите политички партии нема да бидат запознаени.
Лидерот на СДСМ, Венко Филипче, минатата недела во телевизиско гостување го повика премиерот да свика затворена собраниска седница за следните чекори за евроинтегративниот процес.
Доколку Мицкоски не го стори тоа, Филипче рече дека таква седница ќе иницира пратеничката група на СДСМ во Собранието, на која, како што рече, владејачкото мнозинство ќе треба да објасни дали и каков план има за продолжување на евроинтеграцискиот процес.