„Веќе започнатата постапка за вработување во институциите од јавниот сектор се прекинува ако јавниот оглас е изготвен согласно актите, односно одредбите опфатени во точка 1 од Решението на Уставниот суд, односно ако во јавниот оглас се наведува припадност на заедницата, а пак, кандидатот се обврзува во пријавата да посочи припадност на заедница“, велат од ресорното министерството
Постапката за вработување во институциите од јавниот сектор може да продолжи ако во јавниот оглас не е наведена припадност на заедницата на кандидатот и кандидатот не се обврзува да посочи припадност на заедница. Ова е една од насоките што денеска Министерството за јавна администрација ги упати до државните институциите, со цел како да постапуваат при вработувањата по одлуката на Уставниот суд за замрзнување на алатката „балансер“.
„Веќе започнатата постапка за вработување во институциите од јавниот сектор се прекинува ако јавниот оглас е изготвен согласно актите, односно одредбите опфатени во точка 1 од Решението на Уставниот суд, односно ако во јавниот оглас се наведува припадност на заедницата, а пак, кандидатот се обврзува во пријавата да посочи припадност на заедница“,
се вели во соопштението од министерството.
Според ресорното министерство, во Регистарот на вработени во јавниот сектор не се евидентираат податоците за вработените во институциите.
Уставниот суд на 18 септември на седница расправаше дали со наведувањето на припадноста на заедницата, што е потребно за пополнување на секое работно место, на кандидатите за административни службеници им се ограничува достапноста на секое работно место, односно дали со „обврска на кандидатите за административни службеници во пријавата за вработување меѓу другите лични податоци да наведат и припадност на заедница“ се нарушува начелото на стручност и компетентност и се повредува и уставно загарантираното право на работа и слободен избор на вработување.
Со тоа, уставните судии одлучија да отворат предмет за употребата на „балансерот“ при вработувањата во администрацијата.
Додека не одлучат дали „балансерот“ е уставен или не, тој ќе остане замрзнат.
Според претседателот на Уставниот суд и судија известител по предметот, Дарко Костадиновски, само мерит-системот и компетентноста треба да се единствен критериум за вработување и унапредување.
Националноста, додаде тој, е приватно, лично и внатрешно чувство на припадност на поединецот. Костадиновски потсети дека Уставниот суд веќе донел одлука и тие како уставни судии кажале дека е лично право „да ја изразам, да не ја изразам или да се воздржам“ за националната припадност.
Предметот е оформен по иницијатива поднесена од стариот состав на Државната комисија за спречување на корупцијата (ДКСК) за преиспитување на алатката „балансер“, бидејќи сметаа дека со тоа се прават злоупотреби при вработувањата.
Потоа, опозициските партии на Албанците посочија оти укинувањето на „балансерот“ ќе ги наруши правата на малцинствата.
Првиот вицепремиер и министерот за животна средина и просторно планирање Изет Меџити, кој е дел од владејачката коалиција „Вреди“, рече дека Албанците не губат ништо со укинувањето на овој механизам.
Според него, при формирањето на новата влада, политичкиот договор меѓу „Вреди“ и партнерите од ВМРО-ДПМНЕ бил „балансерот“ да биде унапреден во закон за соодветно претставување на малцинските заедници.