Инаку, просечниот износ на старосните пензии, според статистиката на Фондот, изнесува 22 884 денари, кај семејните пензии тој износ е 16 709 денари, а кај инвалидските 18 830 денари
Ова линерно зголемување на пензиите е изборно ветување на владејачката ВМРО-ДПМНЕ
Собранието денеска ги усвои измените на Законот за пензиско и инвалидско осигурување со кои од 1 септември годинава и од 1 март следната година ќе има линеарно зголемување на пензиите од 2 500 денари месечно.
На 14. седница на Собранието, за предлог-законот за изменување и дополнување на Законот за пензиско и инвалидско осигурување, по скратена постапка, „за“ гласаа 78 пратеници.
Ова линерно зголемување на пензиите е изборно ветување на владејачката ВМРО-ДПМНЕ.
Според податоците на Фондот за ПИОСМ од јуни годинава, вкупно 341 146 лица примиле пензија во државава. Просечната пензија, според статистиката на ФПИОСМ, во јуни изнесувала 21 241 денар, што е 51,5 отсто од просечната нето-плата која изнесува 41 252 денара. Од вкупниот број пензионери, најголемиот дел месецот го туркаат со примања од 13 192 денари до 22 500 денари.
Инаку, просечниот износ на старосните пензии, според статистиката на Фондот, изнесува 22 884 денари, кај семејните пензии тој износ е 16 709 денари, а кај инвалидските 18 830 денари.
Според проценките на „Фајненс тинк“, покачувањето од 2 500 денари ќе создаде дополнителен трошок од 13,5 милиони евра месечно, односно 160 милиони евра годишно.
„Во моментов, се трошат нешто над 140 милиони евра месечно за исплата на пензиите. Со редовното усогласување, тоа е нешто под 6 милиони евра дополнителен трошок месечно, односно дополнителен трошок од 68 милиони евра годишно. Ако се напушти редовното усогласување, а се примени линеарен метод, дополнителни 2 500 денари по пензионер во септември креираат дополнителен трошок од 13,5 милиони евра месечно, односно 160 милиони евра годишно. Тоа се дополнителни средства од близу 100 милиони евра на годишно ниво (споредено со трошокот за редовно усогласување н.з.). Во март, разликата веројатно ќе биде нешто поголема, бидејќи претпоставуваме дека законското усогласување би било помало. Значи, завршуваме со потреба од додатни 200 милиони евра, што е 12 отсто од сегашните расходи на ФПИОСМ. Тоа е голем износ“,
велат од „Фајненс тинк“.
Од Министерството за финансии велат дека со неодамнешниот ребаланс на буџетот се обезбедени дополнителни 81,3 милиони евра за исплата на пензии до крајот на 2024 година. Но, од нив, само половина се за реализација на најавеното линеарно зголемување на пензиите од септември, кои ќе бидат исплатени во октомври. Останатите се средства кои не биле испланирани со иницијалниот буџет.