Охридските локални власти известија дека изработиле регистар на дивоградби регистрирани од општинските инспектори во периодот од 2006 до мај 2019 година. Потегот на општината доаѓа по силниот притисок и закана од УНЕСКО дека Охрид ќе се најде на листата на загрозено светско културно наследство.
„Во оваа елекронска база на податоци внесени се вкупно 1076 предмети за кои … инспекциските служби имаат констатирано прекршувања на Законот за градење и имаат донесено некаков акт со кој се утврдува нелегална градба. Од нив, вкупно 409 се лоцирани во заштитен појас, односно на крајбрежјето на Охридското Езеро, во потегот на Националниот парк „Галичица” и во стариот дел на градот. Во рамки на оваа вкупна бројка, 82 предмети се однесуваат на урбана опрема, 16 се за времени објекти, 8 за плажи, 80 за куќи, апартмани и сместувачки капацитети, а останатите предмети се за помали интервенции и градежни зафати на објекти“,
пишува во образложението на сајтот на општината.
Од општината Охрид информираат дека во следниот период надлежните служби ќе извршат уште една проверка и финално ќе го утврдат регистарот. Според насоките од УНЕСКО, за секоја дивоградба ќе се прави посебна студија за заштита на животната средина. Ќе се уриваат оние објекти за кои стручњаците ќе оценат дека имаат негативно влијание врз животната средина или се наоѓаат блиску до езерото.
Освен статистички податоци, локалната власт не споделува други информации. На пример, на која парцела се дивоградбите, кој е сопственик или инвеститор на тие објекти. А, такво нешто вети градоначалникот Константин Георгиевски во интервју за проектот „Само прашај“.
Тогаш тој изјави и дека јавноста ќе се фрапира од имињата на сопствениците на познати хотели, кафулиња и семејни објекти кои ќе треба да се уриваат.
„360 Степени“ денеска повеќе пати се обиде, но не успеа да разговара со градоначалникот на Охрид. Од службата за односи со јавност само кусо ни одговорија дека повеќе информации од регистарот за дивоградби ќе се објават по завршување на дополнителните проверки.