Покрај одлуките за повлекување од употреба на спорната поштенска марка и поништување на целокупниот тираж, разрешени се раководителот на Бирото за филателија и Советот за поштенски марки
Министерството за надворешни работи (МНР), преку вршителот на работи во амбасадата во Белград, упати извинување до српските власти во врска со грешката направена во АД „Пошта на Северна Македонија“, истакнувајќи дека е направен ненамерен дизајнерски пропуст за кој веќе се преземени соодветни чекори.
Од МНР соопштуваат и дека се донесени одлуки за повлекување од употреба на спорната поштенска марка и поништување на целокупниот тираж, како и одлука за разрешување на раководителот на Бирото за филателија и одлука за разрешување на Советот за поштенски марки.
Беше пренесено и официјалното извинување од АД „Пошта на Северна Македонија“ во кое се изразува жалење за ненамерната грешка и техничките пропусти при објувувањето на марката, велат од МНР.
„Министерството за надворешни работи недвосмислено и децидно отфрла каква било поврзаност со овој немил настан, изразувајќи жалење до сите засегнати страни, на граѓаните во Србија, Босна и Херцеговина, Црна Гора и Хрватска. Регионалната соработка и добрососедските односи се главниот столб на надворешната политика на Република Северна Македонија и остануваме посветени на нашите заложби за уште посилен ангажман и соработка со непосредното и поширокото соседство во исполнувањето на преостанатите обврски и реформи на патот на европската интеграција, со силен меѓусебен амалгам и во интерес на сите граѓани во регионот“,
велат од Министерството за надворешни работи.