Град Скопје ќе субвенционира 50% од вредноста на велосипедот, но не повеќе од 3 000 денари по лице и 30% од вредноста на електричниот тротинет, но не повеќе од 7 000 денари по лице, со вклучен персонален данок на доход
Од Град Скопје најавуваат дека наскоро ќе објават повик за доделување субвенции за велосипеди и електрични тротинети за 2020 година.
Новитет оваа година е што граѓаните ќе можат да доставуваат фискални сметки за купен велосипед или електричен тротинет од 1 јануари 2020 година. Средствата што Град Скопје ќе ги субвенционира се во износ од 50% од вредноста на велосипедот, но не повеќе од 3 000 денари по лице и 30% од вредноста на електричниот тротинет, но не повеќе од 7 000 денари по лице, со вклучен персонален данок на доход. Согласно предвидените финансиски средства, Град Скопје оваа година ќе додели субвенции за околу 2 800 велосипеди и околу 215 електрични тротинети.
Повикот ќе биде отворен до 30 ноември 2020 година или до реализирање на средствата, а ќе се спроведува по принципот „прв дојден прв услужен“.
Во Буџетот на Град Скопје за 2020 година за оваа намена се предвидени 10 милиони денари од кои 8,5 милиони денари ќе бидат наменети за велосипеди, а 1,5 милиони денари за електрични тротинети.
„Градот Скопје континуирано работи на промоцијата на употребата на алтернативни превозни средства, чија предност, за разлика од автомобилите, е намалување на метежот во сообраќајот и загадувањето на животната средината“,
велат од градската администрација.
За 2018 и 2019 година, Град Скопје додели вкупно 7 255 субвенции за граѓаните што купија велосипед и вкупно 313 субвенции за оние што купија електричен тротинет.