115 000 денари е плата на министер, јас приватно работев и повеќе заработував. Не мора да бидам тука, нека дојде друг да се справува тука доддека се тие по одмори, јас и сабота и недела бев на работа, рекла министерката за финансии Гордана Димитриеска-Кочоска на денешниот брифинг со новинарите, пренесува ТВ Телма
Министерката за финансии Димитриеска-Кочоска на новинарско прашање дали ќе се намалат функционерските плати откако тие минатата година по одлука на Уставниот суд се зголемија за 78% одговорила дека решението не е во намалувањето, оти додека министрите работат многу и напорно, други се одмараат на викенди и празници, притоа додавајќи дека доколку се планира платите да се намалат, таа ќе замине од позицијата.
„ Не знам што ќе правиме, но ако планираат да ги намалат, јас заминувам. Еве, платата на министер е 115 000 денари. Јас приватно работев и повеќе заработував. Не мора да бидам тука, нека дојде друг тука да се справува, додека се тие по одмори, јас и сабота и недела бев на работа. И немав платено прекувремено“,
изјавила министерката за финансии.
Дополнително, Димитриеска-Кочоска им посочила на новинарите да прашаат по институциите со дополнително управни одбори колку земаат и колку фамилијарно се земаат примања, кој како е врзан и што се се прави.
„Дајте ми една причина, министри со вакви нервози и стресови-зошто треба да останам. А најмногу се критикувани од новинарите и не се лутам за тоа. Проблем се директорите“,
кажала Димитриеска-Кочоска.
Уставниот суд на седница на 21 март минатата година , донел одлука да ги укине член 4 од Законот за изменување и дополнување на Законот за плата и други надоместоци на избрани и именувани лица во Република Македонија и член 1 од Законот за изменување на Законот за плата и други надоместоци на избрани и именувани лица во Република Македонија.
Во одлуката од Уставниот суд се наведува дека со првата укината одредба е утврдено дека основицата за пресметување на плата на избраните и именуваните лица се применува од јануари 2012 година и е во износ од 25 726 денари, додека со втората укината одредба е предвидено дека платите на избраните лица во 2014 година може да се зголемат за четири отсто започнувајќи со исплатата на платите во 2014 година.
„Уставниот суд смета дека во случајот, постои двојство во уредувањето на прашањето за основицата на платата на избраните и именуваните лица, што претставува неконзистентност во законското уредување на оваа материја. Судот утврди дека истовремено постојат две норми, односно две правни правила за утврдување на основицата на платата oпфатени во еден ист закон, односно едното е член 11 од Законот, според кое основицата се определува според просечната плата остварена во претходната година што ја утврдува Државниот завод за статистика, а второто правило е оспорената одредба од член 4 во кој основицата е утврдена во фиксен износ од 25 726 и која со усогласувањето од четири отсто (предвидено со второспорената одредба) изнесува 26 755 денари што е всушност основица која е моментално во сила односно примена“,
се додава во соопштението од Уставен суд.
Во одлуката од Уставен суд се нагласува дека при донесување на одлуката се воделе и од образложението кое го дале државните ревизори во Извештајот на ДЗР, кое е цитирано и во образложението на Одлука на Уставен суд.
„Неоспорувајќи ја состојбата во која се издава ревизорскиот извештај, во насока на законско доделување на платите на избраните и именуваните лица, истакнуваме дека основицата согласно член 11 од законот е просечната исплатена месечна плата по вработен во Републиката за претходната година, која за 2021 година изнесува 29 943 денари, при што укажуваме на потребата од доследна примена на член 11 од наведениот закон и усогласување на основицата за пресметување на платите со податоците за исплатена месечна плата на Државниот завод за статистика, по претходно донесување на измени на наведениот закон“,
се додава во одлуката.