По гафот, кој предизвика реакции и во Србија, ќе биде поништен целиот тираж од 6 000 примероци од оваа марка, која е дел од серијата „Северна Македонија во ЕУ“
„Македонски пошти“ ја повлече од својата веб-страница марката со карта на голема Хрватска, а на тоа место објави извинување за гафот, која наиде на реакции и во соседна Србија.
На Денот на победата над фашизмот, Северна Македонија издаде марка со карта на „голема Хрватска“, пишува белградски „Блиц“.
Овој потег на Поштата на Северна Македонија наиде на силни негодувања и осуда од Србите, како и двете најголеми српски организации во Македонија, Демократската партија на Србите во Македонија и Српската заедница во Македонија, пишува „Блиц“.
Марката е пригодна и, како што посочуваат од АД Пошта на Северна Македонија, е дел од серијата „Северна Македонија во ЕУ“, чија цел е одбележување на претседавањето на Република Хрватска со ЕУ.
„На поштенската марка претставена е погрешна карта на Република Хрватска и другите земји од регионот и поради тоа марката веднаш се повлекува од употреба што подразбира поништување на целокупно издадениот тираж од 6 000 примероци“,
пишува во извинувањето од раководството на компанијата.
АД Пошта на Северна Македонија – Скопје изразува жалење за ненамерната грешка, особено што, издавањето на серијата поштенски марки „Северна Македонија во ЕУ“, како што се наведува, се совпаѓа со 9 Мај, Денот на Европа.
„Наша цел беше со оваа поштенска марка да изразиме благодарност до хрватското претседателсво со ЕУ за помошта и поддршката што Хрватска ѝ ја дава на нашата држава. Издавањето на поштенските марки е регулирано со Законот за поштенските услуги и Правилникот за издавање и продажба на поштенски марки и вредносници“,
наведуваат од „Македонски пошти“.
АД „Пошти“ пред неколку дена издаде и марка „Северна Македонија во НАТО“, во тираж од 6 000 примероци и со номинална вредност од 30 денари.
Марката за НАТО, генералниот директор на АД „Пошти“ Ејуп Рустеми им ја испратил на претседателот Стево Пендароски, претседтелот на Собранието Талат Џафери, премиерот Оливер Спасовски, на министрите Радмила Шекеринска, Никола Димитров и Бујар Османи, како и на Генералштаб на Армијата и на градоначалникот на Скопје. Поштенската марка за НАТО е испратена и до седиштето на Алијансата и до амбасадорот на САД во државата, како што соопштија од „Македонски пошти“.