Според Заев нема дилеми околу македонскиот јазик затоа што, како што вели, тој е наша реалност. За историјата на Гоце Делчев пак, верува дека ќе се најде решение со кое двата народа ќе останат горди
Коментирајќи ја изјавата на бугарскиот премиер Бојко Борисов дека Бугарија кажала кои се нејзините услови за Северна Македонија да биде примена во Европската Унија, лидерот на СДСМ Зоран Заев вели дека очекува во идниот период земјата „да продолжи да биде наш искрен пријател“ и дека ќе се решат отворените прашања.
„Покажавме дека сме пријателска Влада. Претходната Влада имаше капацитет само за кавги со соседите, а ние најдовме решенија. Ја интегриравме земјата во НАТО и добивме одлука за почеток на преговори. Двете стратешки цели ги исполнавме. Очекувам во идниот период Бугарија да продолжи да биде искрен пријател на Република Северна Македонија. Народите ни се блиски. Владите се блиски и верувам дека во иднина ќе продолжиме со соработката. Мене ми е јасно дека сме застанати на петтиот елемент од историските поглавја. Четири прашања затворивме: Цар Самоил, Кирил и Методиј, Климент и Наум и тоа објавено и во ред, во духот на заедничката историја од минатото. Верувам дека и прашањето за Гоце Делчев ќе го решиме во духот на заедничката историја, каде што двата народа, и македонскиот, и бугарскиот, ќе останат горди народи. И тука да нема дилема“,
изјави Заев на пресконференција.
Заев вели дека му е драго што нема дилема околу македонскиот јазик и македонскиот народ, бидејќи како што вели, тоа е наша реалност.
„Тоа е признато и потпишано и не почна од мене. Во 1999 година Љубчо Георгиевски потпиша договор на македонски јазик, согласно со Уставот. Новината е што потпишавме договори каде што е македонското кирилично писмо и таму стои потписот на Заев и Бојко Борисов. Тие не го негираат. Современ политички субјект и современа европска влада не може да негира идентитет. Идентитетот наш е во личната карта во Обединетите нации и признат од целиот свет“,
рече Заев.
Според него, тензијата со Бугарија била испровоцирана од реториката на „домашната опозицијата“.
„Верувам дека во наративот којшто е испровоциран од домашната опозиција сега се создава една ваква тензија која што треба во духот на разумноста, одговорноста и пријателството да ја надминеме. Треба конечна гаранција да им биде на граѓаните дека нема договор постигнат меѓу поединци. Тоа се институциите, Влади, Парламент и народите. Затоа договорот за секое следно прашање ќе биде придобивка за двете земји, затоа што само тогаш имате договор кој живее, функционира и гради пријателство. Во духот на Договорот за добрососедство којшто го потпишавме треба да ги решаваме работите за пријателство, добрососедство и соработка, а не за кавги и проблеми,“
рече Заев.
Заев додаде дека двете земји имаат договор пред избори да не преговараат и да прават договори , затоа што како што вели, тогаш притисокот е поголем и врз историските комисии.