„Испратив писмо до сите институции што се поврзани со Министерството за транспорт, вклучувајќи го и ЈП за државни патишта, каде што барам писмено да ми дадат извештај до каде се со реализација на проектите и зошто се закочени. Мислам дека така се работи, а не со раскажување на состаноци, не со кажување и образложување на приказни, туку факти коишто се ставаат на хартија и коишто си се архивираат за утре и следни генерации после нас да можат да видат и да споредат“, вели новиот министер за транспорт
Не сакам да давам рокови за завршување на автопатот Кичево – Охрид, но ќе се залагам тој да биде пократок. Иако, ние во нашата програма напишавме дека автопатот ќе биде готов до крајот на 2026 година, што сметам дека е реален рок.
Ова вечерва во гостување на ТВ Сител го кажа Александар Николоски, новиот министер за транспорт, одговарајќи на прашање за колку време може да се очекува да биде готов автопатот Кичево – Охрид, проект што беше започнат пред 10 години. Тој дополни дека ќе направи сè со својот тим и заедно со новиот директор на Јавното претпријатие за државни патишта тој рок да биде пократок.
„Она што го знам како мое сознание и што денеска го видов во Министерството, зашто тоа беше првото нешто што го побарав од вработените – има три проблеми, од кои првиот е со изведувачите, со кои имало еден несериозен однос. Не постоел притисок врз изведувачите да го работат она за што се платени, зашто тоа се народни пари. Вториот проблем се имотно-правни прашања или прашања за експропријација, кои сметам дека можат да се решат. А третиот проблем се свлечиштата или т.н. косини, односно во планинскиот дел од патот, кои технички можат да се решат“,
рече Николоски.
Според него, откако денеска направил увид во проектот, видел, како што рече, катастрофална постапка на проектот, односно дека ништо не се работело.
„Наидуваме на пустош, на една состојба за којашто може слободно да се каже дека е тотална неработа. Испратив писмо до сите институции што се поврзани со Министерството за транспорт, вклучувајќи го и ЈП за државни патишта, каде што барам писмено да ми дадат извештај до каде се со реализација на проектите и зошто се закочени. Мислам дека така се работи, а не со раскажување на состаноци, не со кажување и образложување на приказни, туку факти што се ставаат на хартија и коишто си се архивираат за утре и следни генерации после нас да можат да видат и да споредат“,
вели тој.
Николоски посочи дека мора сите да се свесни оти стартната ситуација е катастрофална, како и дека следните две години, како што рече, нема да бидат мед и млеко, зашто состојбата е многу полоша од тоа како изгледа однадвор.
На прашањето за договорот со „Бехтел и Енка“ и за тоа што се случува со овој проект, Николоски посочи дека треба да се декласифицира договорот, повторувајќи дека не знае по кој закон договорот бил класифициран за државна тајна.
„Со промената во ЈП за државни патишта треба да се декласифицира договорот и сите граѓани да го имаат на увид, зашто и таму се трошат државни пари. Второ, треба сериозно да се пристапи и да се види во оваа рамка на средства, колку најмногу, а тоа е повеќе од ова што досега беше презентирано во јавноста, можат граѓаните да добијат километри автопат. Ако одиме во било што друго, ќе е недомаќински. Досега државата има исплатено нешто помалку од 250 милиони евра на изведувачот, што е огромна сума. Ако се повлече сега државата, тие средства ги губи. Тоа е недомаќинско и нерационално работење. Сега треба да имаме силен фокус. Да видиме дали цените се реални и она што е предвидено е реално. И што може да се добие плус од тој проект и тој проект да се заврши“,
вели Николоски.
На прашањето дали ќе може да се репреговара тој договор, Николоски смета дека треба да се разгледаат сите можности како граѓаните да добијат повеќе клометри автопат, како што посочи, од тоа што сега е предвидено во договорот.
„Во врска со проблемот со експропријацијата, ќе треба да го решаваме со законски измени и со подобри постапки. Ништо не се работело и во тој дел. Потоа ќе можеме да дадеме рокови“,
рече тој.
Според него, состојбата што ја видел во министерството е многу полоша од тоа што е претставено во јавноста, односно, како што рече, наместо да се работи на крупните инфраструктурни проекти, се работело на поставување на инструменти за мерење на проток на сообраќај.
„Ни фалат основните работи во инсфраструктурата во Македонија, а се размислувало како да се стави шминката. Состојбата е тешка, лоша, но мене ми е работа да ја поправам“,
вели Николоски.