Никој не знае кога оваа година ќе заминеме на одмор, таква е реалноста, пред сѐ потребни се здравствени критериуми и протоколи за работа, вели претседателот на Грчката федерација на хотелиери Григорис Тасиос, пренесува МИА.
Потенцира дека е важно и тоа како ќе се регулира пристигнувањето на туристите, но рано е да се каже што точно ќе се бара од посетителите од странство.
„Очигледно дека постои расположение од сите за работа, без разлика дали се туристички агенции, транспорт, хотелите, но, без здравствени критериуми и протоколи не може да се случи тоа. Истото важи и за балканските земји кон Грција. Ние, како туристичка структура, одиме еден чекор понапред. Ако во следните денови не постои заедничка европска активност околу протоколите, како земја, да предложиме да се направат меѓудржавни договори“,
вели Тасиос.
Според планот на грчката Влада за постепено олабавување на мерките и постепено префрлање во новото секојдневие, отворањето на хотелите и туристичките објекти е планирано за месец јуни. Хотелите што работат во текот на целата година, предвидено е да се отворат во јуни, додека пак сезонските туристички објекти се во последната, седма фаза од планот, без засега да биде одреден конкретен датум.
„Сезоната, веројатно се чини дека ќе почне од јули и повеќе не постои прашањето за сезонско работење на туристичките објекти и хотели или во текот на целата година, веќе сѐ е исто“,
вели тој.
Според него ситуацијата е многу тешка, бидејќи сезоната теоретски е загубена и станува збор за само два месеци, кои не се доволни.