„Во очекување сме на донесувањето на системско решение на Закон за забрана на нефер трговски практики, особено во трговија со прехранбени и земјоделски производи“, вели претседателката на Инспекцискиот совет
Сведоци сме дека Државниот пазарен инспекторат изминатиот период беше активно на терен и тоа најдобро можеа да го почувствуваат граѓаните, бидејќи постојано ги контролираше гарантираните цени. Сега малку да оставиме и на совеста на субјектите на надзор, односно на производителите и на трговците.
Ова денеска го рече претседателката на Инспекцискиот совет, Даниела Рендевска, одговарајќи на прашањето дали од утре кога завршува траењето на мерката за гарантирана цена на дел од прехранбените производи, дел од месните производи, безалкохолните пијалаци и пивото граѓаните може да очекуваат повеќе инспектори на терен и дали со тоа нема да има селективност во кој објект, кај кој трговец да се пазарува.
„Во очекување сме на донесувањето на системско решение на Закон за забрана на нефер трговски практики, особено во трговија со прехранбени и земјоделски производи. Секако инспекторите од пазарниот инспекторат и понатаму будно ќе ја следат ситуацијата на терен и се надеваме дека и субјектите на надзор, односно маркетите ќе бидат во функција на граѓаните“,
вели таа.
Од крајот на март годинава, Рендевска најави дека сите државни инспекторати, кои се вкупно 15 на број, плус инспекциската служба при Агенцијата за храна и ветеринарство ќе започнат да ги вршат инспекциските надзори преку системот е-инспектор.
Со тоа, рече таа, 90 отсто од државните инспектори кои се во надлежност на советот целосно ќе ја вршат инспекциската постапка преку овој систем.
„Со овој систем ќе ја зголемиме довербата кон субјектите на надзор, ќе обезбедиме подобра бизнис-клима, зашто субјективното влијание на инспекторот ќе се минимизира“,
рече Рендевска.
Мерката за гарантирана цена на дел од прехранбените производи, како лебот, млекото, јогуртот, тестенините, дел од месните производи, како и на безалкохолните пијалаци и пивото од утре нема да важи.
Истекува и рокот на владината одлука со која беа намалени увозните давачки за зеленчукот.
Институциите најавуваат засилени контроли за да се интервенира во случај на драстично поскапување на производите, со оглед дека законот за нефер трговски практики, со кој се очекува да се амортизира состојбата, сè уште не е изгласан.
Според вицепремиерот за економски прашања Фатмир Битиќи, контролите ќе бидат откако утре завршува мерката „гарантирана цена“, а доколку се утврди дека има неетичко однесување од трговците, најави дека ќе следуваат казни.
„Јас сум конзистентен. Секое неетичко однесување на било кој еден трговец ќе се казни на најсериозен начин. Што тоа ќе значи, знаеме од минатото. Сметаме дека конечно лекцијата е добиена, дека во државата освен правење на бизниси и креирање на профит мора да има морал и етика и кај компаниите. Сметам дека замрзнувањето на цената не е една од мерките која соодветствува со пазарната економија и дека треба да се вратиме во нормалните текови на живеење, а секако останува на бизнисмените и тие соодветно да се однесуваат“,
додаде тој.
Тој повика во Собранието да се усвои законот за нефер трговски практики, кој е веќе поднесен, а за кој вели дека е фантастичен, но не му е јасно зошто уште не го гледа денот кога треба да се изгласа и усвои.
Министерот за економија Крешник Бектеши пред два дена најави дека гарантираните цени на производите во маркетите од следниот месец нема да се продолжат, а редот во нелојалната конкуренција вели дека ќе се става со носењето на законот за нефер трговски практики, кој, според него, ќе доведе и до намалување на цените на прехранбените производи.