Дополнително, со претставките со кои со оспоруваат измените за законите за патни исправи, односно за безбедност во патниот сообраќај, ВМРО-ДПМНЕ бара Судот да донесе решение за ставање на времена мерка на овие законски измени, односно тие да не бидат во сила сè до одлучувањето за нивната уставност
Како што најави нејзиниот лидер Христијан Мицкоски минатата недела, а за што ја доби поддршката и од Извршниот комитет, опозициската ВМРО-ДПМНЕ денеска до Уставниот суд поднесе претставки за оценување на уставноста на законите поврзани со промената на личните документи.
За иницијативите, непосредно по нивното поднесување на прес-конференција од пред Уставниот суд, информира портпаролот на ВМРО-ДПМНЕ, Наум Стоилковски, кој рече дека претставките се однесуваат на два закона – оној за изменување и дополнување на Законот за патните исправи (член 3) и Законот за изменување и дополнување на Законот за безбедност на сообраќајот на патиштата (член 5), инаку двата објавени во „Службен весник“ на 3 јуни 2021 година.
Дополнително, со претставките до Уставен, ВМРО-ДПМНЕ бара Судот да донесе решение за ставање на времена мерка на овие законски измени, односно тие да не бидат во сила сè до одлучувањето за нивната уставност. Инаку, рокот до кој граѓаните треба да ги заменат патните исправи и возачките дозволи со документи со новото уставно име, согласно законите, е 12 февруари 2024 година.
„Со овие претставки се бара Уставниот Суд да поведе постапка за оценување на уставноста на овие два члена. Дополнително во двете претставки се бара Уставниот суд да донесе решение за времена мерка. Односно согласно Деловникот на Уставниот суд, Уставниот суд да го запре извршувањето на оспорените членови на Законите, сè до одлучувањето дали се тие уставни или не. Двата члена, односно во двата закони се наведува дека патните исправи, односно возачките дозволи и возачките книшки, „кои го содржат натписот Република Македонија издадени до денот на започнувањето на примената на овој закон, ќе важат до истекот на рокот на важење кој е наведен во возачката дозвола, најдоцна до 12 февруари 2024 година“. Овие членови во двата закони се директно спротивни на Уставот, и тоа во членовите 8, 9, 11, 25 и членот 27 од Уставот“,
рече Стоилковски.
Тој додаде дека со прифаќањето на предлогот за времена мерка до носење конечна одлука би престанало да важи 12 февруари да биде краен рок за важење на пасошите и возачките дозволи со старото уставно име.
Стоилковски воедно наведе дека Уставниот суд досега покажал ажурност во носењето на одлуки и оти очекуваат тоа да се биде случај и сега.
„На тој начин ќе се надмине оваа криза којашто е предизвикана од неспособноста на власта, намерна или ненамерна. Имајќи ја предвид состојбата пред пунктовите за фотографирање и за земање на новите документи, имајќи ја предвид состојбата дека нема нови обрасци во МВР, а тендерот е закажан за март месец, половина од луѓето на коишто им биле издадени пасоши и возачки дозволи (само 1,2 милиони од 2,5 издадени пасоши досега се сменети) всушност МВР немаат можност да ги заменат документите до 12 февруари, како што предвидуваат овие два оспорени членови“,
рече Стоилковски.
Со одлука на Уставниот суд за ставање на времена мерка за овие два члена, кажа Стоилковски, ќе се избегнат дополнителни компликувања и товар врз Собранието или, пак, непотребни билатерални комуникации со други држави, односно со Грција.
„Се надеваме дека Уставниот суд ќе биде агилен и ќе ги земе предвид двете претставки за оцена, но и дека за двата оспорени членови на закон ќе се воведе времена мерка“,
рече портпаролот на ВМРО-ДПМНЕ.
Тој посочи дека личните карти не се опфатени со промената на личните документи чиј краен рок е 12 февруари, туку дека тие важат и понатаму и граѓаните да не се изложуваат на „понижувања и турканици за промена на лични карти. Рокот, како што рече тој, е само за пасоши и возачки дозволи.
„Накусо, за овие три години СДС и ДУИ издавале документи со подолг рок на важење од она што го преземале како обврска во 2018 година, за сега, иако ги имале предвид податоците колку пасоши и возачки дозволи треба да се променат, не презеле навремени мерки за да се остави државата без потребниот број на обрасци во МВР. Ова е веќе видено, СДС и Оливер Спасовски ваква иста состојба предизвикаа и во изборната 2020 година пред техничката влада, само и само со една цел, на штета на граѓаните, товарот да го префрлат на техничкиот министер од опозицијата односно од ВМРО-ДПМНЕ“,
рече Стоилковски.
На новинарска забелешка и прашан за коментар во врска со тоа што оспорените измени на двата закони се променети врз основа на уставен закон за спроведување на Преспанскиот договор, а кој се менува со двотретинско мнозинство, како и укажувањата на шефот на дипломатијата Бујар Османи дека и на пример да се сменат двата закони, ќе биде потребно да се смени и уставниот закон, Стоилковски со одговор:
„За сето ова како што наведов и во образложението надлежност има Уставниот суд. Уставниот суд треба да процени по двата поднесоци, за измените на двата закони, оној што е за патните исправи и оној за возачките дозволи и тоа што се бара, едно е дали ќе биде прифатено тоа што тие два закони, односно измените на тие два закони биле спротивни и во колизија со пет члена на Уставот, второ е што може и би требало да воведе времена мерка со што ќе се стават надвор од сила до конечното одлучување на Уставниот суд.
Инаку, прашањето за продолжување на рокот за издавање на новите лични документи минатата недела го отвори шефот на државата, Стево Пендаровски. Тој во интервју за ТВ Сител рече дека со брза интервенција на два закона – за лична карта и за патни исправи – може да се пролонгира рокот за вадење нови лични документи и наместо до февруари да биде продолжен до септември или октомври.
Премиерот Димитар Ковачевски, пак, рече дека нема ништо против таквиот предлог доколку тоа прашање може да се реши на меѓународно ниво. Го упати Пендаровски да оствари комуникација со претседателката на Грција по однос на ова прашање бидејќи, како што кажа, и тоа е нивото на кое може да се комуницира.
Од кабинетот на Пендаровски, во четвртокот минатата недела за порталот 24инфо.мк, рекоа дека претседателот е подготвен да разговара со претседателката на Грција, Катерина Сакеларопулу, со цел да се изнајде начин за пролонгирање на рокот за важност и замена на личните документи и патните исправи.
Истовремено, оттаму потсетуваат дека тој дал свој предлог за пролонгирање на рокот за замена на документите и посочуваат дека размената на информации околу Договорот од Преспа треба да оди преку МНР.