Изјавата на лидерот на опозициската партија следува откако евроамбасадорот Дејвид Гир во интервју за МИА кажа дека ако ВРМО-ДПМНЕ е за интеграција на земјава во ЕУ и за пристапни преговори, тогаш е јасно што треба да направи – да ги поддржи уставните измени. Дополнително, Гир кажа и дека повторно преговарање и промена на Преговарачката рамка за земјава не е можно
Лидерот на опозициската ВМРО-ДПМНЕ, Христијан Мицкоски, денеска од Вевчани изјави дека евроамбасадорот во земјава, Дејвид Гир и неговиот колега од Софија треба да разговараат со бугарската влада во насока на, како што вели, отворање на патот на Македонија кон Европската Унија без ултиматуми и диктати.
„Мислам дека евроамбасадорот Гир треба да поразговара со својот колега во Софија и со бугарската влада за конечно да се отвори патот на Македонија и македонските граѓани кон Европската Унија без диктати, ултиматуми и хегемонистички барања после сите национални понижувања и порази во изминативе 30 години“,
изјави Мицкоски.
Изјавата на лидерот на опозициската партија следува откако евроамбасадорот Дејвид Гир во интервју за МИА кажа дека ако ВРМО-ДПМНЕ е за интеграција на земјава во ЕУ и за пристапни преговори, тогаш е јасно што треба да направи – да ги поддржи уставните измени. Дополнително, Гир кажа и дека повторно преговарање и промена на Преговарачката рамка за земјава не е можно.
„Па, ако партијата (ВМРО-ДПМНЕ) е за ЕУ и пристапни преговори, јасно е што треба да се направи. Имаме договор од јули 2022 година. Имаме отворени пристапни преговори. Процесот на скрининг беше успешен и сега треба да се направат уставните промени за потоа земјата да може да продолжи напред и да се занимава со клучните прашања како владеењето на правото и борбата против корупцијата“,
изјави Гир во интервјуто за МИА.
Ваквата изјава на Гир, како и на други претставници од меѓународната заедница, како што рече Мицкоски, е слушната повеќепати. Додаде дека ВМРО-ДПМНЕ е за европска иднина, но оти нема да прифати бугарски диктат.
„Јас сум исклучително загрижен зошто не ги загрижува високото ниво на корупција, криминал, понижувањата што се случуваат при издавањето на патните исправи на македонските граѓани, срамот којшто секојдневно го сведочиме, насилството во М-НАВ, и можам да редам вака до утре за сè што претставува вистински проблем за македонскиот граѓанин“,
додаде Мицкоски.