„Претседателот Пендаровски има предлог да видиме дали може да бидат направени тие законски измени, бидејќи да направите законски измени без согласност на сите кои се потпишани, а се работи за меѓународни документи, не би било така едноставно и прашање е колку би било применливо. Но, еве сепак ќе пробаме се“, вели Ковачевски
Ако може да се реши на меѓународно ниво, зошто да не. Ова е одговорот кој премиерот Димитар Ковачевски го даде за предлогот на претседателот Стево Пендаровски да се направат измени на неколку закони и да биде пролонгиран рокот за замена на лични документи кој, согласно Преспанскиот договор, истекува на 12 февруари.
„Голем број на граѓани треба да го исполнат законскиот рок во однос на менување на патните исправи, пред се тука мислам на меѓународните. Прво ќе се консултирам со двајца министри со кои разговарал претседателот. Сите предлози за мене се добри кои можат да унапредат нешто. Верувам дека и претседателот Пендаровски може да се слушне со претседателката на Грција бидејќи и тоа е нивото на коешто може да се комуницира. Ќе поразговараме на седница на Влада во однос на можноста ова да се направи. Претседателот Пендаровски најдобро знае бидејќи тој беше вклучен во подготовката на Преспанскиот договор, при зачленувањето во НАТО бидејќи колку што знам беше координатор за НАТО, веројатно има повеќе детали околу тоа како би можело да се реши на меѓународно ниво со Грција и зошто да не“,
рече премиерот Ковачевски денеска одговарајќи на новинарски прашања при отворањето на Поликлиниката во Сарај.
Според Ковачевски, промената на лични документи не е обврска наметната од Владата, туку таа произлегува од потпишан меѓународен договор.
„Ова е обврска која произлегува од потпишан меѓународен договор кој овозможи да станеме земја членка на НАТО и таа обврска е наведена во закон. Така што не може да се каже дека Владата нешто направила бидејќи сепак се работи за законски решенија, за уставни измени кои се правени во Собранието, меѓутоа и на сите ни се добро познати во текот на изминатите години“,
додаде Ковачевски.
Премиерот вели дека она што Владата може да го направи е да го олесни процесот за вадење на документите.
„Министерството за внатрешни работи отвори поголем број на пунктови, определи поголем број на вработени коишто ќе треба да работат, но очигледно е дека тоа ќе треба да се зголеми уште повеќе. Еве и претседателот Пендаровски што има предлог да видиме дали може да бидат направени тие законски измени, бидејќи да направите законски измени без согласност на сите кои се потпишани, а се работи за меѓународни документи, не би било така едноставно и прашање е колку би било применливо. Но, еве сепак ќе пробаме се“,
додаде Ковачевски.
Претседателот Стево Пендаровски предлогот го кажа во неговото вчерашно гостување во „Тема на денот“ во „Дневникот“ на ТВ Сител.
Прашан во контекст на процесот на промена на личните документи поради промената на уставното име на државата, Пендаровски предлага пролонгирање на рокот за нивно вадење.
„Прво, тоа е срамно понижување на македонските граѓани. И непотребно. Второ, ова го предложив на најмалку двајца министри во македонската влада – со брза интервенција во два закона, за лична карта и за патни исправи, и ако е потребно и Законот за безбедност во патниот сообраќај. Тоа се прави во едно попладне, знаеме дека може да се направи во едно попладне, не мора со европско знаменце да биде. Ќе ги измениме тие два закона, ќе го пролонгираме рокот, наместо февруари да биде септември-октомври“,
рече претседателот Пендаровски.
За тоа потребно е претходно да се известат и Грците дека, како што рече, немаме намера да бегаме од обврските од Преспанскиот договор.