Нападот се случил додека 59-годишниот Ли Јае-мјунг држел прес-конференција за новинарите, кога од толпата излетал маж кој го прободел јужнокорејскиот опозиционер на левата страна од вратот. Осомничениот напаѓач наводно првично се претставил како поддржувач на Ли барајќи му автограм, а потоа ненадејно го нападнал
Лидерот на јужнокорејската опозициска Демократска партија, Ли Јае-мјунг, е избоден со нож во вратот за време на посетата на пристанишниот град Бусан во југоисточниот дел на земјата.
Нападот се случил додека 59-годишниот Ли држел прес-конференција за новинарите, кога од толпата излетал маж кој го пробол јужнокорејскиот опозиционер на левата страна од вратот.
По првично укажаната помош во болницата во Бусан, Ли со хеликоптер е пренесен во болница во Сеул.
Првичните лекарски извештаи говорат дека неговата состојба не е животозагрозувачка, но постои можност за зголемено крвавење поради оштетувањето на југуларната вена која ја носи крвта од главата до срцето.
На снимките од нападот кои беа објавени на социјалните мрежи се гледа како непознатиот маж во толпата го напаѓа Ли додека тој одговара на новинарски прашања. Објавени се и фотографии на кои опозиционерот е легнат наземи со затворени очи, а некој му држи шамивче на вратот во обид да се запре крвавењето.
Осомничениот напаѓач наводно првично се претставил како поддржувач на Ли барајќи му автограм, а потоа ненадејно го нападнал. Уапсен е на самото место, но засега одбива да ги каже мотивите за нападот.
Демократската партија, чиј лидер е нападнат, го нарече инцидентот „терористички напад врз Ли и сериозна закана за демократијата“ и ја повика полицијата да спроведе целосна и брза истрага за нападот. Истрага за нападот нареди и претседателот на Јужна Кореја, Јун Сук-јол, кој изрази загриженост за безбедноста на Ли.
Инаку, Ли Јае-мјунг, кој загуби на претседателските избори во 2022 година, е поранешен градоначалник на Сеонгнам, град во близина на главниот град на Јужна Кореја. Во моментов му се суди за наводен поткуп додека бил градоначалник на Сеонгнам. Тој негира вмешаност во наводниот чин нарекувајќи го судењето фарса пред парламентарните избори во Јужна Кореја закажани за април 2024 година.