Министерството за здравство во Газа објави дека повеќе од 20 000 Палестинци се убиени, а повеќе од 53 000 се ранети од почетокот на војната
Генералниот секретар на Обединетите нации, Антонио Гутереш, изјави дека начинот на кој Израел ја спроведува својата воена операција создава огромни пречки при дистрибуција на хуманитарна помош во Газа.
ОН предупредуваат дека само 10 отсто од помошта потребна за погодената енклава пристигнува во Газа.
По неколкудневно одложување на гласањето и интензивни преговори за да се избегне заканата од американско вето, Советот за безбедност на ОН вчера усвои ублажена резолуција со која се повикува на чекори за да се овозможи „безбеден, непречен и проширен хуманитарен пристап“ до Газа и „услови за одржлив крај“ на борбите.
Гилад Ердан, амбасадорот на Израел во ОН, рече дека Советот за безбедност требало повеќе да се фокусира на ослободувањето на заложниците и дека фокусот на „механизмите за помош“ е непотребен бидејќи Израел дозволува испорака на помош „онолку колку што е потребно“.
Според израелските податоци, од почетокот на војната, 5 405 камиони со хуманитарна помош влегле во Газа со храна, вода и медицински материјали.
Соединетите Држави и Израел се противат на прекинот на огнот и велат дека тоа ќе ѝ овозможи на исламистичката милитантна група да се прегрупира и повторно да се вооружи.
Сепак, администрацијата на американскиот претседател Џо Бајден стана сè покритична за зголемениот број жртви и хуманитарната криза додека Израел ја продолжува својата копнена и воздушна офанзива.
Министерството за здравство во Газа објави дека повеќе од 20 000 Палестинци се убиени, а повеќе од 53 000 се ранети од почетокот на војната.