„Нема ниту еден денар повеќе од одобрениот приход што го прави РКЕ да ѝ се даде на некоја компанија. Да престанат шпекулациите дека ќе биде екстра давачка и ќе се заработат екстра пари. Не, тоа ќе биде во рамките на одобрениот приход на компанијата која врши дејност за дистрибуција на електрична енергија. За сметка на собирањето на овие пари ќе се намали цената за мрежарина“, вели Бислимоски
Досега потрошувачите, корисниците на мрежата плаќаат мрежарина која де факто се состои од повеќе делови, меѓутоа можеме да кажеме дека имаме фиксен и варијабилен дел. Пристапот на мрежа ќе биде тој фиксен дел. За сметка на тоа ќе се намали варијабилниот дел или делот кој е трошок или надоместок за дистрибуиран или пренесен киловат-час, објаснува професорот Талески
Во однос на тоа колку ќе изнесува овој пристап на мрежа, Бислимоски вели дека сè уште се прават анализи, но висината ќе биде во распон од 50 до 250 денари
Од 1 јануари потрошувачите на електрична енергија на сметките ќе имаат нов надоместок која се однесува на пристап до мрежата, кој нема да биде нов трошок, уверуваат од Регулаторната комисија за енергетика (РКЕ).
Претседателот на РКЕ, Марко Бислимоски, вели дека воведувањето на пристапот на мрежа ќе значи намалување на цената за мрежарината.
„Нема никој да заработи повеќе пари од она што го определила РКЕ. Колку ќе биде тој надоместок, правиме анализи. Но, тој надоместок значи намалување на цената за мрежарина, односно за дистрибуција на електрична енергија. Нема ниту еден денар повеќе од одобрениот приход што го прави РКЕ да и се даде на некоја компанија. Да престанат шпекулациите дека ќе биде екстра давачка и ќе се заработат екстра пари. Не, тоа ќе биде во рамките на одобрениот приход на компанијата која врши дејност за дистрибуција на електрична енергија. За сметка на собирањето на овие пари ќе се намали цената за мрежарина“,
рече Бислимоски на денешната прес-конференција на која го објасни воведувањето на овој пристап до мрежа.
Според Бислимоски, со мерката се штитат редовните потрошувачи
Бислимоски вели дека воведувањето на пристап до мрежа е за сите потрошувачи приклучени на дистрибутивниот систем. Тој нагласи дека во изминатиот период потрошувачката на електрична енергија, на дистрибутивната, во Македонија е намалена за 10 отсто, а една од причините, според него е што се изградиле многу фотоволтаици, тренд кој вели дека треба да продолжи.
„Но, ние кога определуваме цена приходот го делиме со количина. Колку се намалува количината, толку се зголемува и цената. Секогаш сме за правично распределување на трошоците за електрична енергија. Тие што не поставиле фотоволтаици, најчесто домаќинствата, нема потреба да плаќаат заради намалување на потрошувачката. Заради тоа го воведуваме пристапот кон мрежа. Потрошувачите на дистрибутивната мрежа, а во најголем дел се домаќинствата, со оваа мерка ги штитиме и го намалуваме трошокот за мрежарина. Имаме голем број на домаќинства коишто трошат минимално електрична енергија во текот на годината или, пак, нула. Досега целиот товар паѓаше на редовните потрошувачи. Редовните потрошувачи кои имаат вообичаена месечна потрошувачка ги покриваа трошоците на сите останати и тоа е пракса која постои во многу земји во Европа. Правиме правична распределба на трошокот за електрична енергија“,
рече Бислимоски.
Професорот Рубин Талески, кој беше на прес-конференцијата беше заедно со Бислимоски, а за кој од РКЕ велат дека бил предводник на тимот кој работел на реформите со блоковите, исто така го оправда воведувањето на овој пристап до мрежа и вели дека тоа не е дополнителна давачка.
„Досега потрошувачите, корисниците на мрежата плаќаат мрежарина којашто де факто се состои од повеќе делови меѓутоа можеме да кажеме дека имаме фиксен и варијабилен дел. Пристапот на мрежа ќе биде тој фиксен дел. За сметка на тоа ќе се намали варијабилниот дел или делот кој сега само како еден се плаќа, а тоа е трошок или надоместок за дистрибуиран или пренесен киловат-час. За домаќинствата тоа е цена по киловат-час, а за поголемите, и кај нив има не само кај домаќинствата, кај поголемите индустриски потрошувачи, комерцијални потрошувачи тие плаќаат надоместок и за ангажирана моќност. Со воведување, ова се приближни бројки, на овој фиксен надоместок варијабилниот надоместок, односно сегашниот надоместок ќе се намали за некаде до 20-ина проценти за домаќинствата и малите потрошувачи од категорија“,
рече Талески.
Луксузот ќе треба да се плати
Според Талески, причина за воведувањето е поправична распределба на трошоците. Електричната енергија, вели Талески, колку и да е потребна, насушна на сите нас, сепак е тоа некаква привилегија.
„Некој треба да изгради мрежа, да ја одржува мрежата и да биде подготвен во секое време да ви обезбеди услуга. Тој луксуз треба на некој начин да се плати. Е сега, ако во државата имате некаде околу 240 илјади броила или мерни места коишто или не трошат струја или некои од нив трошат многу малку, сепак дистрибуција треба за нив да обезбеди услуга, независно дали потрошиле електрична енергија или не, а не може да ги наплати бидејќи многу малку трошат. Е затоа ние сега останатите коишто нормално трошат и навистина ни треба електричната енергија треба да ги плаќаме трошоците за нив. Од тој аспект овој надоместок воведува поправична распределба“,
додаде Талески.
За висината на пристапот до мрежа се уште се прават анализи
Во однос на тоа колку ќе изнесува овој пристап на мрежа, Бислимоски вели дека се уште се прават анализи, но висината ќе биде во распон од 50 до 250 денари. За тоа, како што рече, ќе треба да се види како ќе влијаат другите параметри на цената.
„Некој што има викендица и ако плаќа месечно 100 или 150 денари месечно е поправично за оние што редовно трошат и плаќаат. Викендиците се најчесто во планински предели, трошоците за одржување се многу поголеми и нема потреба да плаќаат оние што се најредовни“,
додаде Бислимоски.
Бислимоски во објаснувањето рече дека со пристапот до мрежа, мрежарината за дистрибуција би се намалиле и до 20 отсто, а таа во вкупната цена, согласно последната одлука е 33 отсто.
„На 20 отсто намалување тоа е намалување на крајната цена кај редовните потрошувачи за повеќе од осум отсто“,
рече Бислимоски.
На прашањето колку броила се регистрирани што имаат многу мала потрошувачка, односно што се што се во празни станови или викендички, Талески рече дека околу 110 илјади се броила кои во текот на 12 месеци немаат потрошувачка, а околу 150 илјади се оние што имаат минимална потрошувачка од 18-30 киловат-часови и тие ќе плаќаат повеќе, колку ќе биде определено.
„Останатите, особено тие што се греат на струја ќе им се намали мрежарината. Колку тоа ќе учествува во крајната сметка се зависи од тоа колкава ќе биде цената на електричната енергија, а и заради блоковите и евтината тарифа има различни домаќинства како трошат. Некои трошат само во евтина тарифа, има мала сметка за електрична енергија тогаш трошокот за дистрибуција ќе му биде голем. Некои трошат само во висока тарифа и се во четвртиот блок на потрошувачи тогаш трошокот за мрежарина ќе му биде како процент помал“
додаде Талески.