Пратеникот од редовите на ВМРО-ДПМНЕ оцени дека поднесената претставка против судијата Неџат Мемети од Судот во Куманово е во името на слободата на говор и заштитата на критичката мисла и побара таа да биде сериозно разгледана од Судскиот совет бидејќи, како што рече, на ваквите судии не им е место во македонските судови
Пратеникот од ВМРО-ДПМНЕ, Бране Петрушевски, информира дека денеска до Судскиот совет поднел претставка против судијата Неџат Мемети од Основниот суд Куманово, кој пресуди во корист на неговиот колега од СДСМ, Мартин Костовски, кој го тужеше Петрушевски за навреда и клевета искажана од собраниска говорница.
Петрушевски оцени дека поднесената претставка против Мемети е во името на слободата на говор и заштитата на критичката мисла и побара таа да биде сериозно разгледана од Судскиот совет бидејќи, како што рече, на ваквите судии не им е место во македонските судови.
„Неџат Мемети противуставно, противзаконски и против пресудите коишто ги има како пракса и во Република Македонија и во Европскиот суд за човекови права осуди пратеник за јавно искажан збор од собраниска говорница. Ако се дрзнал вака да осуди пратеник, може само да се замисли како суди на граѓаните во Република Македонија“,
рече пратеникот од ВМРО-ДПМНЕ.
Освен што не се уважува пратеничкиот имунитет, додава Петрушевски, денес сме сведоци и на осуда на новинари за критичка мисла, на критичкиот извештај на Европската комисија во делот на правосудството, но и на пресуди кои стигнуваат од Судот во Стразбур за противправно постапување на македонските судови.
Петрушевски неодамна ја објави пресудата од Основниот суд Куманово според која тој во говор од Собранието го омаловажил колегата пратеник од редовите на СДСМ, Мартин Костовски, и му ја повредил честа. Според пресудата, тој на пратеникот Костовски треба да му исплати 150 илјади денари плус законска камата за душевна болка предизвикана од навреда искажана од собраниската говорница.
Освен претставката до Судскиот совет, Петрушевски неодамна најави дека ако е потребно за случајот ќе се обрати до Меѓународниот суд за човекови права во Стразбур.