Од фотографијата се гледа како напаѓачот поминува низ кружните врати во трговскиот центар и носи бел блузон, црна капа и темни панталони
Министерството за внатрешни работи (МВР) обезбеди фотографија од лицето кое со огнено оружје денеска попладне пукаше кон две лица во трговскиот центар „Ист гејт“ во Скопје.
Од фотографијата се гледа дека напаѓачот носи бел блузон, црна капа и темни панталони и како поминува низ кружните врати во трговскиот центар.
Едно лице е во критична состојба, а другото е пренесено на Клиниката за торакална хирургија.
МВР ја информира јавноста дека на фотографијата обезбедена од полициските служби е лицето што го изврши кривичноправниот настан.
„Притоа, ги повикуваме сите граѓани доколку го забележат ова лице, имаат било какви сознанија за него или корисна информација која може да помогне во истрагата која СВР Скопје ја води во координација со јавен обвинител, веднаш да известат во најблиската полициска станица или да пријават на телефонските броеви 192 или 112“, посочуваат од МВР.
Првичните информации за пукањето во трговскиот центар попладнево стигнаа од граѓани на социјалните мрежи, а по кратко време официјална потврда за инцидентот стигна и од Министерството за внатрешни работи.
„Денеска (24.10.) од трговскиот центар ‘Ист гејт’ во Скопје е пријавено дека било пукано кон две лица кои се здобиле со повреди и се пренесени во болница за укажување помош. Полициски екипи се упатени на местото на настанот и се преземаат мерки за расчистување на случајот“,
информираа првично од МВР.
Неофицијално, како што објавуваат дел од порталите, цел на пукањето повторно бил Раде Трајковски со прекар Штекли кон кого, исто така во „Ист гејт“, беше пукано пред два месеца.