Избори за куќен совет и Груевски спомнати во препукувањата помеѓу Христијан Мицкоски, претседателот на опозициската ВМРО-ДПМНЕ и Стево Пендаровски, претседателот на државата околу нивните рејтинзи
Претседателот на ВМРО-ДПМНЕ, Христијан Мицкоски, во денешното гостување во радио „Лидер“, коментирајќи го рејтинг на претседателот на државата, Стево Пендаровски, потенцира дека дури и да се кандидира за претседател на куќен совет во зградата каде што живее не може да добие повеќе од два гласа.
„Мислам дека кога станува збор за Стево Пендаровски сите партии теоретски да се опкружат околу него, да се обединат и да го поддржат, прашање е дали ќе го гласаат повеќе од 100 000, сите партии. Мислам дека во зградата каде што живее, ако се пријави за претседател на куќен совет, тешко да добие повеќе од два гласа“,
истакна Мицкоски.
Мицкоски во текот на своето гостување порача дека во овој момент не треба да се губи време со лик како што е Стево Пендаровски.
„Јас знам што точно зборува Пендаровски, но повторно ќе кажам дали треба човек во овој момент воопшто да губи време со лик како што е Стево Пендаровски“,
додаде Мицкоски.
Претседателот на државата Стево Пендаровски реагираше на изјавата на лидерот на ВМРО-ДПМНЕ, Христијан Мицкоски, преку став испратен од неговиот кабинет.
„Христијан Мицкоски е последниот политичар во Македонија кој би требало да зборува за личниот рејтинг“,
вели претседателот Пендаровски.
Според него, Мицкоски и по цели пет години како претседател на ВМРО-ДПМНЕ има двојно помал рејтинг од поранешниот претседател Никола Груевски.
„Во македонската политичка историја, претседателите на најголемите политички партии секогаш имале двојно повисок личен рејтинг од партиите кои ги воделе. Ова беше случај и со Бранко Црвенковски и со Зоран Заев кај СДСМ, и со Љубчо Георгиевски и Никола Груевски кај ВМРО-ДПМНЕ. Мицкоски е единствениот исклучок затоа што има 50 отсто понизок рејтинг од партијата која ја предводи“,
заклучи шефот на државата.
Како најпрецизен индикатор за личниот рејтинг на Мицкоски, Пендаровски ја посочува последната анкета на фондацијата ИРИ, на која, како што тој вели, претседателот на државата има најголема доверба, а Мицкоски не се наоѓал ниту меѓу првите петтемина на листата.
ВМРО-ДПМНЕ: Пендаровски да се запраша каде е коренот на неговиот личен рејтинг и непрепознатливост
Од опозициската партија ВМРО-ДПМНЕ испратија реакција на ставот на претседателот Пендаровски, во кој посочуваат дека рејтингот на Пендаровски е статистичка грешка, бледа појава, со уште побледи ставови.
„Наместо да се фрустрира од изјавите на претседателот Мицкоски, Стево Пендаровски да се запраша каде е коренот на неговиот личен рејтинг и непрепознатливост, ако се потруди сигурно ќе го најде кај неговиот поданички однос кон Ковачевски и Ахмети, кои многу пати до сега не му дозволиле да се согласи со сопствениот став, па мора да менува изјави согласно диктатот од Зајас или Илинденска. Навистина е трагично во што се претвори Стево Пендаровски, а уште пожално е за позицијата која ја извршува. Пендаровски е човекот кој сам кажа дека го составувал предлогот кој прерасна во бугарски диктат за промена на уставот, тој е човекот кој трчаше да ги потпише измените во КЗ, и слеп извршител на сите наредби на власта“, се вели во
соопштението од опозициската ВМРО-ДПМНЕ.