Од Сојузот велат дека и покрај тоа што има најиновативна инсулинска и антидијабетна терапија, тие не ја добиваат и затоа велат дека е дојдено време да си го земат она што по Устав, закон и буџет им следува
Сојузот на здруженија на дијабетичари на Македонија за утре во 19 часот најави дека ќе одржи предупредувачки мирен протест пред Министерството за здравство. Протестот, како што велат од Сојузот, е поради тоа што лицата со дијабетес не ја добиваат соодветната терапија.
„Завршија сите рокови, логички, правни, измислени и смислени игри и манипулации. Заврши времето на лаги и обезличување на 150 000 граѓани, на 45 000 лица со дијабетес на инсулин. Заврши сето што можеше ‘нашето’ министерство за здравство и ‘нашата’ Влада на Република Северна Македонија да ги манипулираа 700 дечиња и млади со пумпи, сетови за пумпи, сензори, глукомери и со терапија. Ова доаѓа после најдолгото трпение, најголемата конструктивност, најпосветени за соработка, после многу инвестирање во достоинството наше, на лицата со дијабетес“,
се вели во соопштението испратено од Сојузот на здруженија на дијабетичари на Македонија.
Од Сојузот велат дека и покрај тоа што има најиновативна инсулинска и антидијабетна терапија, тие не ја добиваат и прашуваат зошто е тоа така.
„Им поминаа и на администрацијата и на одговорните сите рокови. Затоа што дојде време да си го земеме она што по Устав, закон и буџет ни следува“,
се додава во соопштението.
Оттаму повикуваат на достоинствено однесување, без насилство и нарушување на јавниот ред и мир и напоменуваат дека ова е протест на лицата со дијабетес и се оградуваат од, како што велат, какви било други ознаки, присвојувања и обиди за негова инволвираност во меѓупартиски, политички и други видови на пресметки.
Од Сојузот на здруженија на дијабетичари велат дека повеќе од половина година не добиваат навремена терапија, глукомери, игли и ленти, како и сетови за децата со Тип 1. Тие велат дека се приморани по неколку пати во месецот да одат до аптеките и во неизвесност дали ќе стигнат на време потребните лекови, трошат дополнителни средства од својот домашен буџет.
Министерот за здравство Фатмир Меџити, вели дека е свесен за проблемот на лицата со дијабетес, а доцнењето според него се јавува поради административните процедури.