Според првичните информации, нема повредени или материјална штета
Најмалку три беспилотни летала биле пресретнати на небото над московскиот регион рано утринава, јавуваат руските новински агенции повикувајќи се на службите за итни случаи, додека едно беспилотно летало е соборено во соседната област Калуга.
„Според прелиминарните информации, три беспилотни летала се движеле кон Москва во различни периоди“,
соопшти ТАСС повикувајќи се на извор од службата.
Во близина на селото Валуево беа соборени два дрона, јави агенцијата РИА. Селото е на околу 30 километри југозападно од Кремљ. Едниот беше во областа Калуга, која граничи со Московската Област.
Друг дрон е соборен во областа на градот Кубинка, на околу 63 километри западно од Москва, пренесе РИА. Во близина на Кубинка има руска воздухопловна база. Според првичните информации, нема повредени или материјална штета.