Со свеченост симболично беше означен почетокот на спроведувањето на Планот за интегритет на МВР – документ создаден во соработка со Женевскиот центар за управување со безбедносниот сектор ДЦАФ
Планот заедно со веќе воведените тестови за интегритет на (ново)вработените во МВР треба да придонесат за намалување на корупцијата, почитување на етичките стандарди, како и контрола и надзор над вработените во Министерството за внатрешни работи
Планот за интегритет на Министерството за внатрешни работи содржи мерки што треба да ja спречат корупцијата и неетичкото однесување во полицијата.
Целта е јакнење на одговорноста, зголемување на транспарентноста, контрола над дискрециските овластувања, почитување на етичките вредности, како и воведување систем за надзор и контрола на однесувањето на вработените во МВР.
„Оттука Планот за интегритет на МВР за периодот 2023-2025 година всушност може да се оцени и како дел од мозаикот што ја заокружува институционалната антикорупциска рамка и ќе послужи како еден од суштинските инструменти за идентификувањен и спречување на ризиците за корупција и нарушување на интегритетот во најекспонираните области на одговорност“,
смета Оливер Спасовски – министер за внатрешни работи.
Планот за интегритет, како документ, е создаден во соработка со Женевскиот центар за управување со безбедносниот сектор ДЦАФ. Според Центарот, ваквите планови играат клучна улога во градењето јавна доверба, обезбедувањето регионална стабилност, но и во усогласувањето со европските стандарди – што на крајот го отвора патот за интеграција во Европската Унија.
„Развивање и спроведување на Плановите за интегритет во контекст на процесот на интеграција во Европската Унија е од витално значење за земјите кандидатки, за да ја покажат својата посветеност во борбата против корупцијата, да ги поддржат демократските вредности, да го зајакнат владеењето на правото, а преку тоа да го поттикнат економскиот развој“,
вели Ирена Џајковска – ДЦАФ.
Микаел Атерхог, кој е раководител на „СИДА“ за Македонија, смета дека спроведувањето на Планот ќе биде предизвикувачки, но и процес што ќе донесе резултати. Вели дека со ова МВР прави чекор напред во зголемувањето на својата транспарентност за активностите насочени кон намалување или превенција на ризиците од корупција.
„Сега планот треба да биде спроведен и следен одблизу. Само преку имплментирање на принципите на интегритет, професионализам и отчетност може да се осигура дека полицијата ќе биде почитуван чувар на правдата, спроведувајќи го владеењето на правото и заштитувајќи ги правата на сите граѓани без каква било пристрасност“,
рече Микаел Атерхог – раководител на „СИДА“ за С Македонија.
Според деканот на Факултетот за безбедност, Никола Дујоски, полицискиот интегритет е многу актуелна тема која доаѓа во момент кога, според него, се случува пресвртница во развојот на Министерството.
„Во некои држави вакви планови веќе се во својата 12, 13 или 15 фаза на имплементација. Тоа вообичаено се држави со низок степен на корупција и со висок степен на лична свест, нешто со што ние, за жал, не можеме многу да се пофалиме. Не сме држава со низок степен на корупција, ниту пак сме држава во која личната свест е на високо ниво. И токму оттука е уште поголема обврската на МВР многу внимателно, многу прецизно и многу суштински да се занимава со интегритетот и особено сега во следната фаза со спроведувањето на овој План“,
смета Никола Дујоски – декан на Факултет за безбедност – Скопје.
Денешниот настан беше симболичен почеток на спроведувањето на Планот.
„360 степени“ веќе информираше за измените во Законот за внатрешни работи донесени во април 2022 година со кои еден од условите за вработување во МВР е положен тест за интегритет. Со тестот што кандидатите го полагаат во Центарот за обука на МВР во Идризиво, треба да се оцени колку личноста е склона на корупција и предрасуди, а колку е морална и лојална. Тестот е воведен по многу пријавени случаи до Секторот за внатрешна контрола на МВР.
„Јас сум уверена дека таквиот пристап – и со воведување на тестот за интегритет и со воведување на темите за полициски интегритет во основната полициска обука, ќе даде резултати и ќе имаме уште поголема доверба на јавноста во полициското работење и ќе имаме намалена коруптивност од страна на полициските службеници“,
Суза Трајковска – помошник-министер за Центарот за обука – МВР. (8 март, 2023г.)
Тоа веќе требаше да биде и проверливо. Се воведе тест за проверка на професионалниот интегритет за веќе вработени во МВР. На пример, при планирана акциска контрола за брзо возење, ненајавено со автомобил би поминал тим од Одделот за внатрешна контрола, кој со употреба на прикриени технички средства би документирал дали полицискиот службеник ќе покаже коруптивно однесување. Работна група во МВР изготви и правилник за тестирањето. Но овој тест сè уште не се спроведува.