Советот одлучи да го продолжи договорот и да го одблокира изборот на судии откако од Владата добиле препорака да продолжат со постојните тела и институции со кои ги спроведувале овие тестови досега, сè додека друга институција или тело не добие акредитација
Судскиот совет на Република Северна Македонија на денешната 445 седница донесе одлука да се склучи Анекс на Договорот со веќе постојните институции, односно со Институтот за социолошки и политичко-правни истражувањa и „Виста“, за спроведување на психолошките и на тестовите за интегритет.
Тестовите се потребни за избор на нови и унапредување на постоечките судии во повисоките судови.
Станува збор за истите тестови за кои претходната претседателка Весна Дамева не потпиша анекс за продолжување на договорот бидејќи Судскиот совет добил одговор од Институтот за акредитација дека во земјава нема акредитирана институција за нив, како што бара Законот за судови.
Промената на одлуката за потпишување анекс доаѓа по добиена информација од Владата, преку Министерството за правда, во која се препорачува Судскиот совет да продолжи со постојните тела и институции со кои ги спроведува овие тестови до 2022 година, сè додека друга институција или тело не добие акредитација.
Експретседателката Дамева рече дека е добро што Владата по два месеци одговорила, но оти јавноста треба да знае дека никој не го блокирал овој процес, затоа што Судскиот совет доставил информација до Владата и се чекало два месеци да се произнесе.
„Судскиот совет не беше виновен за ситуацијата“,
изјави Дамева, посочувајќи дека ќе гласа „против“.
Новиот претседател на Судскиот совет, Сашко Георгиев, како и членовите Селим Адеми, Ивица Николовски, Лорета Георгиева и Мери Радевска, посочија дека со оглед на добиената информација од Владата нема пречка за потпишување анекс договори за продолжување на договорите со двете постојни тела, со кои досега се правеле тестовите.
Одлуката за прифаќање на препораката и потпишување анекс беше донесена со седум гласа „за“ и еден „против“.
Георгиев пред десетина дена на брифинг со новинарите посочи дека поради неможноста да се полагаат овие тестови досега бил блокиран изборот на 30-ина нови судии во основните судии и на осум судии во скопска Апелација.
Од 2015 година до крајот на 2022 година овие тестови беа спроведувани со „Виста груп“ и Институтот за социолошки и политичко-правни истражувања. За таа цел, биле потпишан еден договор во 2015 година, кој секоја година бил продолжуван на по една година. Во 2019 бил потпишан нов договор, кој на истиот начин се продолжувал сè до крајот на 2022 година кога Дамева не потпишала поради информацијата дека нема акредитирана институција во земјава за овие тестови.