СВР Тетово апелира до возачите да не возат пребрзо зашто најголемиот број и од годинашните сообраќајни несреќи се резултат на неприспособена брзина според условите на патот и пред сè оние со најтешки последици, порача портпаролот Марјан Јосифоски
Сообраќајната полиција вчера казнила 94 возачи кои возеле пребрзо на автопатот Тетово-Скопје. Двајца од нив се движеле со дури 214 и 227 километри на час. Акциската контрола за брзина со која се движат возилата, особено на автопатот Гостивар-Тетово-Скопје, била спроведена од 15 до 21 часот на тетовско-гостиварското подрачје.
При контролата биле откриени и санкционирани вкупно 94 пречекорувања на максимално дозволената брзина надвор од населено место од 66 во Тетовскиот Регион и 28 во Гостиварскиот.
„Осум од нив односно пет во Тетовско и три во Гостиварско биле за над 70 километри повеќе од максималната брзина, меѓу кои двајца возачи на автопатот Скопје-Тетово се движеле со 214 и 227 километри на час. На сите возачи прекршители им се изготвени соодветни поднесоци и ќе се соочат со предвидените парични глоби, а некои и со времено одземање на возачките дозволи од три месеци до една година. СВР Тетово апелира до возачите да не возат пребрзо, зашто најголемиот број и од годинашните сообраќајни несреќи се резултат на неприспособена брзина според условите на патот и пред сè оние со најтешки последици“,
порача портпаролот Марјан Јосифоски.
Во контролата 21 возило пречекориле од 50 до 70 километри на час, Тетовско – 10 и Гостиварско – 11. При контролата санкционирано е едно пречекорување на пропишаната брзина во населено во Тетово и осум други вида сообраќајни прекршоци во истиот град.