Не секој од нив ако го прашате дали се соочил, дали имал искуство или бил во таква ситуација, ниту се соочил, туку слушнал од некого дека не е добро да имаш сосед кој е заразен од ХИВ или дека нема да ти биде удобно ако имаш геј или лезбејка за шеф, рече Наташа Димова од МЦМС за истражувањето кое откри голема нетолеранција кон одредени групи и заедници во општеството
Граѓаните одговараат на прашања при истражувања и анкети онака како што тие сметаат дека се очекува да одговорат, а не според лично искуство или убедување. Ова е ставот на Наташа Димова од невладината МЦМС која неодамна ги објави резултатите од истражувањето насловено „Толеранција и вредности на граѓаните“ комплементарно со една претходна нивна студија „Ставови и искуство со предрасуди, социјална дистанца и еднаквост во Северна Македонија“.
Прашани – колку удобно или непријатно би се чувствувале ако жена, лезбејка/геј или лице со попреченост за назначено за ваш шеф, 41,3 % рекле дека ако имаат лезбејка или геј за шеф тоа би било непријатно или многу напријатно за нив. Ниту удобно ниту непријатно би се чувствувале 28,1 отсто ако за шеф добијат лице со попреченост.
Димова, во дебата во емисијата „360 степени“ на ТВ Алсат, рече дека поголемиот дел од испитаниците искажуваат став со цел да бидат дел од мнозинското мислење во општеството.
„Не секој од нив ако го прашате дали се соочил, дали имал искуство или бил во таква ситуација, ниту се соочил, туку слушнал од некого дека не е добро да имаш сосед кој е заразен од ХИВ или дека нема да ти биде удобно ако имаш геј или лезбејка за шеф“,
смета таа.
Димова порачува дека е многу важно да се работи на искоренување на ваквите стереотипи и предрасуди што се градат во општеството.
„Образованието, сигурно, е една од причините и мора да се почне оттаму. За среќа, со новата концепција за основно образование и со воведување недискриминаторски одредби во другите закони од основно образование, средно, и стратегиите, можеби, се почнува да се прави нешто, но, на крајот, пак ќе остане на наставниците и професорите доследно да го спроведуваат тоа и да ги пренесат вистинските вредности на учениците“,
вели Димова.
Таа посочува дека и семејството е важен фактор и дека и во него треба да се работи на овие теми.
„Ако имаме затворени семејни односи, семејства во кои не се разговара за вакви појави, нормално е да очекуваме дека лицата ќе бидат позатворени и со поголеми предрасуди и стереотипи кон различните од нив“,
потенцира Димова.
Инаку, истражувањето на МЦМС „Толеранција и вредности на граѓаните“ откри дека големо мнозинство од испитаниците не сакаат соседи кои се зависници од дрога (91%), зависници од алкохол (88.6%), луѓе со криминално досие (82.2%), хомосексуалци (81%), лица заболени од ХИВ (77.2%), и имигранти (71.2%). Мнозинство од граѓаните не сакаат да живеат покрај лица припадници на субгрупи (56.3%), лица со хендикеп (52%) и Роми (52.1%).