Сојузот на синдикати на Македонија (ССМ) апелира до Уставниот суд да не ја прифаќа иницијатива на Стопанската комора која го оспорува законот кој предвидува дека недела е ден за одмор и, како што велат од ССМ, да го поддржи договореното помеѓу социјалните партнери – недела да биде неработен ден за најголем број на работници
Уставниот суд денеска ќе одлучува по иницијативата на Стопанската комора која го оспорува законот кој во својата содржина опфаќа работа во недела.
Комората го оспорува законското решение кое предвидува дека ден за одмор е недела, а според нивната иницијатива ден за одмор може да биде кој било друг ден во неделата. Дополнително, во иницијативата додаваат дека е утврден и додаток на плата за работа во недела во износ од најмалку 50 отсто за секој час поминат на работа и „од тие причини е дозволена нееднаквост на граѓаните пред законите“.
Уставниот суд расправаше за овој случај на седница што се одржа на 14 септември годинава, но одлука не беше донесена поради недоволно мнозинство гласови.
Во меѓувреме, Сојузот на синдикати на Македонија (ССМ) апелира до Уставниот суд да не ја прифаќа иницијатива на Стопанската комора и, како што велат од ССМ, да го поддржи договореното помеѓу социјалните партнери – недела да биде неработен ден за најголем број на работници.
„Потсетуваме дека и рефератот на овој предмет беше да не се поведе постапка, што значи Законот за измените и дополнувањата на Законот за работните односи со кој се уреди правото недела да биде неработен ден да остане во правниот поредок и недела да остане неработен ден, а очекуваме ваквиот реферат, овој пат да биде поддржан едногласно од сите уставни судии имајќи во предвид дека претходниот пат одлуката не беше донесена поради потребниот кворум, но четири уставни судии го поддржаа рефератот“,
велат од ССМ.
Работничките права во демократските држави, додаваат од ССМ, не смее и не може да се креираат само врз основа на волјата и барањата на оние работодавачи кои, како што велат, се мотивирани само од својата желба за поголем профит, без притоа да се води грижа за остварување на работничките и човековите права.