Само итната помош може да излезе од Дебар и Центар Жупа без контрола на полициските пунктови. Комбето што го затекна камерата на „360 степени“ носеше заразено лице со коронавирус кон Скопје.
Сите останати возила и патници прво се легитимираат. Излез за „обичните“ патници нема, а влезот е дозволен само за жителите од двете општини кои се затекнале надвор од дома пред карантинот.
Редовната полиција на пунктот е со заштитни маски и ракавици, а имаат и засилување од специјалните единици. Нема мешање со локалното население, ниту во просториите за физиолошки потреби.
Но, непосредно пред да бидат преземени мерките, нашиот тим престојуваше во Дебар и во селото Баланци од каде се сопружниците заразени со вирусот корона.
Последниот ден или помалку од 24 часа пред карантинот, улиците во селото Баланци беа речиси празни. Тоа е селото од каде потекнуваат првите заразени со коронавирус во Македонија – постари сопружници кои дошле од Италија, а потоа ја пренеле болеста на свои роднини и блиски.
Дека селото со 432 жители според последниот попис е печалбарско, може да се заклучи и од регистарските таблички на дел од автомобилите.
Првиот жител го сретнавме дури повнатре во селото. Сопственикот на мала продавница, Исен Исени, е и роднина на првите заразени. Видно заштитен на работното место, вели немал контакт со парот.
„Луѓето се плашат дека можеби и некој друг бил во контакт со нив, но според информациите што ги добивме, немало многу средби со тие лица. Досега не сум ги видел, откако слушнав на вести, не излегоа надвор“, вели .
За разлика од поголемите места, Исен вели дека селаните не купувале панично.
Ситуацијата е стандардна, не е дека паничат. Mојата продавница е доволна за семејните потребите на селото.
Но, во продолжената обиколка на селото наидовме и на лица кои не беа претпазливи како Исени.
Ние сме во природа.
– Не се плашите од последниве настани со корона?
Со нам не иде никој тука, ние си работиме и си одиме дома. Некој се плаши ама некој нема гајле. Овде е добра природа, се е добро.
Овие двајца работници не беа единствените кои ги вршеа дневните обврски како да нема закана по јавното здравје во селото. На излезот од Баланци, друга поголема група работници изведуваше градежни работи на една од куќите од селото. Тие не сакаа да зборуваат пред камера.
Тргнавме за Дебар, град со најголем број заразени граѓани од COVID-19. Во општинската зграда, на влезот не дочекаа средства за миење на рацете, а внатре имаше тим кој врши дезинфекција на просториите.
Градоначалникот Хекуран Дука, ден пред карантинот, самиот побара градот да биде затворен за влез и излез.
„За Дебар да се стави во карантин и тоа ќе биде многу добра мерка за нашиот град, бидејќи ширењето на вирусот ќе биде ставено под контрола“,
вели Дука.
Кај граѓаните, пак, веќе беше видлива претпазливост. Многумина носеа маски и ракавици. Дури и локалната исламска верска заедница ги забранила верските обреди во објектот, но имаше и такви кои ги игнорираа препораките.
„Бев во џамијата без оџа. Отидовме доброволно, 6 лица бевме собрани затоа што и тој што чувствува дека е болен не оди“
-Вие се чувствувате добро?
„Јас немам проблем. Движењето ми прави добро, свеж воздух“.
„Не се плашам, немам никој во семејството болен. Навистина е најпогодениот град, но погодените се однесени во Скопје. Не маска што и да сакате да ставате, кога Бог ќе рече дека ќе падне ќе падне, кога Бог ќе рече дека нема да ти падне нема да ти падне“
Не беше празна и локалната берберница, но берберот ги презел сите неопходни мерки за да се заштити.
„Култура е да се заштитиш миење на рацете, носење маски“.
-Дали граѓаните на Дебар ги почитуваат овие мерки?
„Прво не ги почитуваа, но сега почнаа да ги почитуваат, време е да покажете граѓанската култура и да се изолирате ако имате симптоми“.
Во дебарската болница дел од персоналот веќе беше во самоизолација. Тоа се оние медицински лица кои први дошле во контакт со парот од Баланци, пред да бидат дијагностицирани со COVID-19.
„Едноставно лекарите кои беа во првиот контакт и медицинските работници медицинските сестри, тогаш решивме тие лекари во предлог на епидемиолог да бидат изолирани две недели дома, во моментов нумерички имаме 6 изолирани доктори дома и 8 сестри, меѓу кои еден радиолог и лаборант“,
Регионот ќе остане под карантин најмалку до средината на април. Ако ситуацијата продолжи да се влошува, не е исклучено полициските пунктови да останат и подолго.