Министерот за надворешни работи посочи дека нашата позиција е кажана и на француското претседателство и вчера на Самитот во Брисел, а по денешното гласање во Софија вели дека треба да се види кој е следниот чекор што ќе го преземе Франција имајќи ги предвид ставовите на двете страни
Шефот на дипломатијата Бујар Османи на прес-конференција денеска се воздржа од коментари за декларацијата што ја освои бугарскиот парламент за одобрување на францускиот предлог под одредени услови. Министерот не сакаше да коментира бидејќи, како што рече, не ја видел конечната верзија, но порача дека сега останува да се види дали Франција ќе има свој конечен предлог и смета дека може да се најде решение ако се има волја.
„Не би коментирал додека не го видам финалниот текст од гласањето зошто слушам разни шпекулации дали имало измени во текот на расправата. Нашиот став е кажан јавно и формално на француското претседателство, останува наредните денови дали француското претседателство ќе има конечен свој предлог во однос на прашањето. Досега имавме работна верзија во која останаа недефинирани некои прашања, а тоа е прашањето на протоколот, бидејќи протоколот ние симболично го гледаме како парадигма на историските интерпретации. Мислам дека доколку има политичка волја да се разберат нашите сензитивности, ќе може да се најде решение и во наредните неколку денови“,
рече Османи.
Османи повтори дека во досегашната верзија имало загради и прашања што, всушност, биле работите кои не се усогласени и уште еднаш ја потенцираше позицијата на Северна Македонија во однос на јазикот, историјата и отворањето на Уставот.
„Работната верзија во загради има и прашања, во преговарачката рамка нема такво нешто и тоа значи дека не се конечно усогласени формулации. По оваа одлука на бугарскиот парламент и нашата позиција претставена вчера, а претходно и на француското претседателство, ќе видиме за каков пристап ќе се одлучи француското претседателство. Во секој случај, нашиот став е дека прашањето на јазикот, историските прашања да не бидат дел од преговарачката рамка, а и секвенционирањето на чекорите помеѓу промените на Уставот и почетокот на преговорите се прашања кои се важни во нашата одлука“,
нагласи министерот за надворешни работи.
На новинарско прашање дали изгласувањето на декларацијата во бугарскиот парламент сега би можело да се смета дека Бугарија повеќе не е кочничар и обвинувањата да се префрлат на македонска страна, тој посочи дека ако Бугарија продолжи да ги има истите ставови, тоа не е промена на позициите и во таков случај ние не може да имаме вина. Сепак, неколкупати нагласи дека не би коментирал за одлуката на бугарските пратеници, со оглед што не го знае финалниот текст што е изгласан.